'

【英超】0:1負曼城 車仔近8戰僅1勝!奧巴美揚肉酸數據 5隻蛋得人驚!

已經殘陣,仲要兩個正選前鋒上半場傷埋,黑到爆嘅車路士,任憑球員幾努力,主場都係以0:1不敵曼城,近8仗英超只得1勝,爭前4機會更亦趨渺茫。

雖然車路士已遙遙落後,但值得安慰嘅,係幾位新人後備上陣都有表現,特別今季由阿士東維拉轉會、只得19歲嘅卓克禾美卡,更加帶來驚喜,睇嚟係時候諗吓換血重用。

未開波前,車路士已有唔少傷兵,簡迪、波查長抖,列斯占士又休息一個月,仲有芝維爾、韋斯利科芬拿、羅夫度斯卓克、美臣蒙特都出唔到,但咁都未夠絕,史達寧開波5分鐘已傷出,22分鐘基斯甸普列錫中埋招,全隊鋒將得番夏維斯,以及入替史達寧嘅奧巴美揚。

雖然天殘地缺,但車路士上半場踢得其實唔曳,令曼城未能掌控中場,艾寧夏蘭特到37分鐘先有首度射門機會,僅僅射高。車仔具威脅攻門唔少,最接近係臨完半場前,入替普列錫嘅卓克禾美卡,禁區外射門中柱唔入。

上半場踢得唔好,哥迪奧拿休息嗰陣落咗唔少嘴頭,曼城球員出番嚟當堂醒晒,壓住車路士攻,而且㩒掣即時見效。60分鐘換入基亞利殊、馬列斯,兩人3分鐘後即合作製造入球,迪布尼分波去左路,基亞利殊第一時間傳出地波,遠柱馬列斯近門射成1:0。

車路士攻力本已受損,奧巴美揚、薛耶治亦形同虛設,特別奧巴美揚,踢咗63分鐘,射門、有威脅傳球、對方禁區內觸球、過人嘗試、傳中全部係零。領隊樸達費事眼冤,索性再換入奧馬利赫捷臣、賀爾、干拿加歷查3位年青球員,唔踢得至少都跑得。

連同卓克禾美卡,成班後生仔表現唔錯,後段可以嘗試搶番主動權,惜始終未能扳平,近8仗英超只得1勝,今季第6次輸波,目前仍排第10,距離第4位嘅曼聯,已有10分距離。

喺呢個艱難時刻,車仔籤運都好曳,周一凌晨英格蘭足總盃第3圈,又要再對曼城,兼且作客,今次睇怕都凶多吉少。