周六晚英超賽事，兩大神鋒孫興民、夏蘭特同時連中三元，分別帶領熱刺同曼城大勝，二人分別刷新英超紀錄，威到震呀！
升班馬般尼對熱刺，開賽4分鐘就領先，不過熱刺狂攻下，16分鐘就由孫興民挑射扳平。完半場前，基斯甸羅美路入靚波，熱刺反超2比1。
熱刺換上普斯迪高路執教後，啲波真係好睇，54分鐘，占士麥迪臣射入靚波，熱刺大局已定下冇放軟手腳，孫興民喺63及66分鐘連入兩球，熱刺贏到5比1，補時般尼拎番球安慰獎，輸2比5完場。
熱刺贏波後，開季3勝1和力追曼城，隊長孫興民已累積106個英超入球，超越C朗同杜奧巴(103、104球)兩大射手嘅英超紀錄。值得一提係熱刺今場收起李察利臣，用孫仔踢正前，攻勢流暢咗好多。
孫仔係威，不過風頭始終都唔及曼城夏蘭特。夏神同晚都係入3球，不過仲多一次助攻，助曼城5比1屠殺富咸、4戰全勝獨領榜首。
完成帽子戲法後，夏蘭特以6球又排喺英超射手榜榜首，總計喺英超入咗42球、送出9次助攻，參與超過50球，而佢只係用咗39場完成，破咗高爾（43場）紀錄。
今次亦係夏蘭特喺曼城嘅第7個帽子戲法，如果單計英超則係第5次。要留意係夏蘭特今場3球都係左腳入，係佢第一次喺曼城完成左腳大三元。
根據統計，夏蘭特今場只得17次掂波、6次傳球、4次成功傳球，但就斬獲1次助攻、3個入球，絕對係怪物級表現。
