一個人到底有幾大愛，先會獨自承擔所有責任，等其他人冇咁難受？曼聯領隊坦哈格被問到點解唔畀C朗落場，佢竟然拋出神回：「唔想佢被侮辱！」
曼聯尋晚以3:6潰敗於曼城腳下，夏蘭特外星人射術固然成為熱話，另一令球迷們關注嘅問題，就係坦哈格嘅換人方針，點解換極都冇C朗份？
撇除華拉尼受傷退下火線，曼聯輸到0比4之後，先用勞基梳爾換馬拉西亞，左閘位換位，Ok，到安東尼世界波追番1:4，坦克再用卡斯米路換麥湯文尼、馬迪爾換拉舒福特，輸到咁大鑊都係位換位，都算，最離奇係之後用防中費特，入替翼鋒查頓辛祖，之前坦克一直keep住個陣，咁點解最後唔用C朗換辛祖，將馬迪爾擺番邊？
C朗今季淪為後備，但之前佢每場波都可以後備落場，嚟到一啲咁重要嘅比場，點解反而要佢坐足全場？
面對記者提問，坦克竟然畀咗個比鳩官更鳩嘅答案：「佢職業生涯實在太偉大，我好尊敬佢，所以我唔想畀佢落場……其實我唔應該公開咁講……同埋另一個原因，馬迪爾需要更多比賽時間去提升狀態。」坦克表面上係唔想畀C朗經歷呢場恥辱性敗仗，而明眼人都知，主要原因其實係馬迪爾需要落場操弗啲，嚟緊會做番正選，身為後備嘅C朗就唔使了。
曼聯名宿堅尼都睇唔過眼，發火炮轟坦克：「咁樣真係好唔尊重C朗！我根本就知夏天嗰陣有4至5間球會提出收購C朗，話史上最偉大嘅球員之一冇人要，簡直係垃圾想法，但坦克夾硬留住佢，但又唔畀佢落場，完全缺乏尊重！」
今仗C朗恩師費格遜都有入場睇波，見到契仔落得如此下場，會唔會後悔當初阻止C朗轉投曼城？如果當日C朗無視爵爺、直接投「城」，今日上演帽子戲法嘅會唔會就係C朗？而夏蘭特又會去咗邊？世事無如果，C朗目前可做嘅，就係繼續操，迎接歐霸盃賽事，萬一繼續冇得落場的話，葡萄牙國家隊會唔會順勢飛走埋佢，真係冇人敢肯定了。
