又濟貧！繼作客不敵森林後，利物浦周六英超聯賽，主場又以1:2負列斯聯，連續兩仗死於護級球隊腳下，搵佢送分隨時易過申請綜援。
利物浦今季其中一個死症，係經常好早失波要追落後，今仗亦唔例外，開波4分鐘就先失，而且係低級錯誤。
祖高美斯追去左路包位，冇壓力下回傳錯到離譜，冇睇龍門艾力臣比加企位，傳番去龍門中路，畀洛迪高摩連奴輕易射入空門。
見對手防線慌失失，列斯聯領先後繼續搶攻，但先後射中楣及近射被撲出，未能擴大比數，反而14分鐘畀沙拿接應羅拔臣傳送，近門射入扳平。
沙拿、法明奴、達雲紐尼斯3前鋒，繼後都有入波機會，但全部未能把握，其中達雲紐尼斯兩次單刀唔入，加上法國門將梅斯利亞救唔少波，令列斯聯保持不失，並喺89分鐘絕殺紅軍。
當時將近完場，列斯聯快速反擊搏攞晒3分，森馬韋利突入禁區，喺雲迪積克、祖高美斯中間快腳射門，替球隊帶來今季第3場勝仗。
VVD呢球包唔切位，佢個人及紅軍主場不敗金身亦同時被破。VVD自2018年1月加盟紅軍後，之前70場佢有份踢嘅英超主場賽事，都能保持不敗；利物浦自2021年3月，英超主場已保持29場不敗，兩個紀錄，同被列斯聯絕殺球粉碎。
利物浦12戰16分，仍然排第9位，落後昔日競爭對手曼城13分。曼城趁阿仙奴周日對森林前，升上榜首。
曼城主場1:0險勝李斯特城，艾寧夏蘭特受傷缺陣，入球能力大減，唯一入波來自奇雲迪布尼，佢以一個精彩自由球，為球隊全取3分。
艾寧夏蘭特周中歐聯對多蒙特，畀舊隊友攔截，引致韌帶受傷，佢出名有腳患，要好小心處理，嚟緊周中歐聯對西維爾，會繼續避戰，下周六英超對富咸亦要觀望。
