超級神鋒，又點止艾寧夏蘭特，仲有佢，富咸中鋒阿歷山大米祖域。唔止係英冠球王，上到英超同國家隊，一樣咁勁揪！
早兩日歐國聯，塞爾維亞作客2:0挫挪威，該仗亦被為兩大神鋒之戰，米祖域對夏蘭特。最後係米祖域有士哥，帶領球隊贏波外，更取得個人第50個國際賽入球。
有份踢11月世界盃嘅塞爾維亞，除咗米祖域，仲有祖雲達斯前鋒杜辛華荷域，鋒線人才濟濟。上仗就係杜辛華荷域先開紀錄，米祖域射成2:0。今次歐國聯，米祖域共入6球，亦憑呢個士哥，壓倒夏蘭特成為神射手。
米祖域係塞爾維亞足球史上，第一位為國家隊射入50球嘅球員，只用咗76場比賽，已經抵達里程碑，效率更勝美斯（107場）、C朗（114場）。
米祖域喺柏迪遜出道，之後効力過安德列治、紐卡素，2018年轉投富咸，一直發展平平，直至上季大爆發，瘋狂攻入43球，打破英冠紀錄，今季同富咸升上英超後，仍然保持高入球量，前7場入6球，僅次夏蘭特排射手榜次席。講到國際賽就仲誇，米祖域喺世盃外圍賽8場入8球，歐國聯5場入6球。
作為升班馬，富咸今季成績超出預期，目前7戰3勝2和2負積11分，喺聯賽榜排第6，米祖域當然就係最大功臣。嚟緊富咸會喺主場惡鬥紐卡素，即管睇吓米祖域仲有冇料到啦！
