倫敦兩大班霸喺開鑼戰都贏波，熱刺黃金組合冇波入，但依然喺主場以4:1反勝修咸頓，展示強大攻力；車路士憑12碼險勝愛華頓，表現僅屬一般，兩隊下周日對陣，展開今季第一場重量級大戰！
熱刺喺今夏上齊子彈，但開鑼戰幾位新兵先做後備，前鋒李察利臣停賽，仍以孫興民、哈利卡尼、古路施夫斯基做攻擊主力。雖然開波12分鐘被修咸頓中場禾特普斯先開紀錄，但之後展開大反攻，完全輾壓對手。
熱刺4個入球，冇孫興民同哈利卡尼份，佢哋更多做牽引同配合工作，入波來自賴恩施斯隆、艾歷迪亞、古路施夫斯基同對手擺烏龍，構成4:1大捷。入波唔再只係集中王牌組合，遍佈攻擊點，嚟緊仲有比列錫、李察利臣兩張好牌可以打，熱刺攻擊深度的確幾得人驚。
至於車路士新季第一擊，表現只屬一般，贏波過程驚險。兩個新加盟主力都係正選，史達寧算活躍，起碼好過兩個前鋒拍檔美臣蒙特同夏維斯。由拿玻里來投嘅中堅高列巴尼下半場中段則抽筋被換出，而另一新兵古古列拿則後備登場。
愛華頓上季護級成功，領隊林柏特成為英雄，開鑼日主場氣氛狂熱，藍旗及林伯嘜頭全場飄揚。球員亦交到貨，攻守都同車仔拉成均勢，可惜上半場補時階段輸12碼，畀佐真奴射入全場唯一一球，令林伯未能喺前東家身上得分；加上防守主力賓葛菲爾剷截時嚴重受傷、送院治療，勢必有排抖，另一守將耶利文拿亦傷出，林伯呢鋪頭都大埋。
