提起麥卡倫，好多資深球迷都會記得佢啲黑歷史，2006年被任命為英格蘭國家隊主帥，因球隊喺2008歐國盃外圍賽出局，短短一年即被炒魷，搞到好多人都忘記咗，佢曾經喺99年擔任助教、輔助費格遜，帶領曼聯成為三冠王。
之後麥卡倫去到邊都冇乜運行，2019年被昆士柏流浪炒魷後，去咗打比郡做技術總監，之後轉職高級顧問，直至今年5月確認重返曼聯擔任助教，新季將輔助坦哈格重建球隊。
呢位61歲嘅前米杜士堡功勳教頭，日前就同佢個仔Josh McClaren主持節目，期間提到點樣可以重新建構曼聯嘅勝利文化，麥卡倫就話「依家嘅曼聯必須逼切咁改變，最重要係團結一致！」
暗示完曼聯內部不和問題嚴重後，麥卡倫提出幾個方案，例如「星期一到星期五嘅正確方向就係不停練習，如果做得啱，星期六就會贏波。」
期間麥卡倫更劍指曼聯幾位球員：「身體語言見到好多細節，好多人成日都攤大雙手抱怨，其實喺呢個時候，任何情況下，你嘅任務就係要追番個波返嚟！」
理論的確係正嘅，到底麥卡倫來季可唔可以成功輔助坦哈格，重建曼聯王朝？大家真係要拭目以待喇！
