阿仙奴以戰養戰，越踢越有冠軍相！阿仙奴尋晚喺英超作客以4比0大勝般尼茅夫，除咗有一系列傷兵復出操起狀態，貴價新兵夏維斯亦喺團結力量下終於開齋，以最強姿態，迎接下周對曼城嘅天王山之戰！
阿仙奴尋晚對般尼茅夫，之前有傷在身嘅薩卡仔、迪勤懷斯、沙列巴都已經好番擔正，托沙則先列後備。般茅陣容都唔差，蘇蘭基掛帥，名宿之子約斯天古華特亦列陣。
兵工廠梗係技高一籌，16分鐘，奧迪哥特傳入禁區，加比爾捷西斯頂中楣，薩卡仔補一頭入網。44分鐘，奧隊射入12碼，阿仙奴半場領先2比0。
換邊後奧迪哥特博到12碼，今次佢讓畀夏維斯處理，呢位德國國腳亦終於開齋；去到補時賓韋特入多粒，阿仙奴大炒般茅4:0，7戰5勝2和，與熱刺同得17分，連盃賽在內10戰7勝3和不敗，係近16年嚟第一次。
唔單止，阿仙奴近4場作客都零封對手，被批評嘅防線終於有進步。而夏維斯射入處子球，打破196日入球荒，隊友們喺佢得手後上前圍住夏維斯，輪流拍打鼓勵。
值得一提嘅係，其實阿仙奴嘅劊子手係薩卡仔，但佢今場兩次讓出12碼，第一次佢企喺12碼點度，然後讓畀奧迪哥特射；第二次佢同奧隊亦協議好，等夏維斯去處理，以上種種，已足以說明阿仙奴係有幾咁團結。
重拾信心嘅夏維斯，今場有38次掂波，23次傳球19次成功，另有1次解圍，4次搶番控球權，10次身體對抗5次成功，賽後獲阿仙奴官方選為最佳。但相信係鼓勵性質居多，如果要係真頒的話，創造3個入球嘅奧隊肯定係首選，不過依家畀夏維斯，相信奧隊都超樂意嘅。
