【英超】高普哥帥英超對決落幕;利物浦1:1和曼城 一生宿敵從此訣別

完場笛聲響起,高普、哥迪奧拿擁抱時間,比以往任何一次都要長,面容亦相對嚴肅,因為雙方都知道,今次好可能係兩人之間最後一次交手。

利物浦主場1:1迫和曼城,兩隊再次合演高水準賽事,配得上兩大名帥英超壓軸對壘。高普話過,離開利物浦之後,冇飯食都唔會再教英超球隊。要睇佢再鬥哥迪奧拿,暫時只能寄望足總盃,但未必有咁嘅機會。

大戰過後,英超榜首3雄咬得更緊,阿仙奴、利物浦同得64分,曼城63分,大家仲有10場未踢。

上半場曼城佔優,領先非常合理。科頓、祖利安艾華利斯喺兩邊拉得開,製造唔少進攻空間,令利物浦防線窮於應付。曼城23分鐘開紀錄,來自一個巧妙角球,奇雲迪布尼不愧傳球大師,將角球輕巧開去前柱,防中史東斯心有靈犀,及時到位近門撞射入網。

利物浦嘗試反攻,威脅只屬一般,但下半場開波只有2分鐘,就藉曼城一次失誤,搏得12碼,令形勢突變。曼城後衛阿基回傳乏力,製造危險,門將艾達臣出迎亦較急躁,將達雲紐尼斯踢跌,被罰12碼。艾達臣更因為呢個攔截而受傷,要由後備門將奧迪加入替。最後麥卡里士打主射得手,為主隊追和1:1。

利物浦氣勢即時打起,展開一波接一波攻勢,61分鐘再派出沙拿入替蘇保斯拉爾,力求後來居上。路易斯戴亞斯曾有兩次近門機會,但都操之過急,一一錯過。

哥迪奧拿見形勢不妙,亦作出調整,派高華錫同「扭波王」杜古上陣,換走迪布尼及祖利安艾華利斯,既增加防守力,又保留突擊全攞3分機會。去到中後段,雙方都有唔少入波機會,無負天王山之戰。後備門將奧迪加表現出色,曾救出麥阿里士打、達雲紐尼斯、蘇保斯拉爾射門;曼城科頓、杜古更分別中楣中柱。

補時階段,杜古禁區內踢完波再踩中麥卡里士打,球證冇畀12碼,亦有些少爭議。最終雙方打和1:1,以全場形勢睇,其實合理到不得了,紅軍同藍月亮,就係咁難解難分。