尋晚曼聯悶和紐卡素，曼聯表現見仁見智，但紐卡素今季堅升呢，爭唔到歐聯，都要有歐霸參賽權，佢哋首循環已打和曼市雙雄，咁硬淨，邊個敢話冇機會？
C朗今季罕見連續兩場打正選，繼周中歐霸盃後，今場對紐卡素繼續做單箭頭，辛祖、安東尼、般奴費南迪斯支援。
整個上半場，C朗都被紐卡素後衞緊緊死盯，欠缺射門機會。兩隊上半場各有5次攻門，紐卡素無限接近入波，祖連頓藉罰球頭槌攻門，中楣彈出，補頂又中埋柱，中一次係冇運，中兩次？要諗諗檢討吓喇。
下半場曼聯加快進攻速度，C朗食過2次詐胡，一個係越位，另一個較具爭議，當時紐記後場有個罰球，守將舒哈將個波碌畀門將尼克普比，C朗認為個罰球已經開咗，即時加速搶走並送入網，但球證唔認同，仲畀咗面黃牌C朗。
到71分鐘，C朗被換走，由拉舒福特入替。C朗離場時不斷搖頭，冇為福仔打氣，亦唔理領隊坦哈格，係唔滿意自己演出，抑或唔順被調出場？
福仔入替後，曼聯繼續加強攻勢，可惜費特、福仔先後錯失黃金機會。先係88分鐘費特空門射斜，到補時5分鐘，卡斯米路傳波靚絕，福仔頭槌睇怕係絕殺，但竟然貼柱出界，最終同紐卡素互交白卷。
坦哈格賽後話：「球隊表現好好，我好滿意，但係贏唔到比賽，我對賽果係失望嘅。我哋成場波都冇失球，我認為我哋控制咗比賽，尤其係下半場……紐卡素可能係全英超體能質素最好嘅球隊，不過我哋喺中場壓制到佢哋，並創造咗好多進攻機會。」
同晚另一戰，維拉實力本來已低於車路士，開波6分鐘即輸冤枉波，更加難砌。維拉中堅泰朗明斯發波瘟，冇壓力下迎頂高波，頂咗畀門前冇人看管美臣蒙特，一聲唔該射成1:0。
古天奴表現極差，謝拉特將呢位巴西仔收起，但車路士食住一球優勢，下半場繼續穩守突擊，65分鐘美臣蒙特射成2:0，3分穩陣落袋。
樸達轉教車路士後，球員信心、水準持續上升，英超連歐聯6戰5勝1和，9戰19分排第4，少熱刺4分但少踢1場。第5位係曼聯，9戰16分，周中快車主場對熱刺，紐卡素10戰15分排第6，下仗主場對愛華頓。
