今晚英超頭場，默郡打吡陪大家睇波送飯！愛華頓開季5輪聯賽3和2負、仲未開齋，領隊林柏特被炒呼聲頗高，遇著回勇兼氣勢轉盛嘅利物浦，高普會唔會送佢一程？
睇番往績，利物浦上季兩次聯賽對賽，都贏到兩球或以上，一場2比0、一場4比1，今季利物浦冇咗文尼，戰鬥力下降，呢點都唔多使拗，好彩今場有達雲紐尼斯坐完波監復出，火力點都好過對上兩場嘅。
愛華頓3連和，表現係好過開咧頭兩仗，但佢哋兵源太短缺，經歷周中快車先再撼班霸級球隊，一定蝕章。高普上次9比0血洗般茅，令柏加被炒，睇番高普紀錄，之前愛華頓嘅馬高施華，亦係輸完畀利物浦後被炒，今晚會唔會歷史重演？
今場盤口，利物浦讓一球球半低水，無論計戰力同往績，都似係輸半博全格局，上盤值得入手嘅。
深夜12點，輪到米蘭打吡開戰，AC米蘭掛名主場鬥國際米蘭。呢對宿敵嘅氣勢，比起上季略為遜色，A米4戰2勝2和，國米4戰3勝1負，但睇番表現，國米始終較平均，平手盤宜撐國米。
