【英超】領先兩粒 被水晶宮逼和 鶴臣笑談成功秘訣;曼城陷信心危機 哥帥:唔係第一次!

曼城出征世界冠軍球會盃前,英超繼續失分,周六主場對水晶宮,雖然曾領先兩球,但補時最後階段失12碼,被2:2迫和。

真係出問題,曼城近6仗,只得1勝4和1負,不斷失分下,同榜首利物浦、阿仙奴已有3及2分距離,但多踢1場,經過今晚賽事,大有機會被榜首雙雄甩開。

的確陣容不整,除奇雲迪布尼繼續養傷,艾寧夏蘭特近期亦加入十字軍行列,但「最重要男人」洛迪卡斯簡迪已波監期滿復出,並且由基亞利殊上半場先開紀錄,列高利維斯54分鐘射成2:0,3分可謂手到拿來。

但曼城今季專注度,的確降低咗唔少,已經唔止一次葬送大好形勢,先係76分鐘畀桑馬迪達追成較接近紀錄,到補時5分鐘,科頓犯天條,米高奧利斯為水晶宮射入12碼,為水晶宮追和2:2完場。

哥迪奧拿賽後受訪,大表失望:「我哋表現出色,控制埋攻守轉換,製造好多死球,但遺憾嘅係,我哋失咗兩分。水晶宮第二個入波,喺呢個水平嘅賽事係冇可能出現,我哋做錯決定,受到懲罰……我哋要更加冷靜,因為已經唔係第一次喇……」

而水晶宮主帥鶴臣,更大談逼和曼城嘅秘訣:「耐性係相當關鍵,佢哋一定會比你擁有更高更高嘅控球權,如果你過早進攻,咁就會畀機會佢哋去搞掂你。」

曼城頻頻失分,但另一隊剛剛相反,直情勢如破竹,愛華頓作客2:0贏般尼,豪取4連勝。

命運由我不由天,自從被英格蘭足總扣10分之後,愛華頓大踢爭氣波,以該隊人腳,要4連勝絕對唔容易。升至第16位後,進入聖誕新年快車,當中包括對熱剌及曼城,睇吓拖肥糖仲係咪咁堅先。