【英超】靚波經典戰!曼城3:2絕殺紐記 迪布尼1入球1助攻;哥帥:佢就係傳奇!

神將登場,曼城又贏!周六英超尾場大戰,曼城與紐卡素合力炮製今季經典戰役,反勝再反勝,最終曼城靠迪布尼後備登場後,斬獲一入球一助攻,戲劇性以3:2絕殺紐卡素。

哥迪奧拿賽後話:「迪布尼就係一位傳奇人物,佢深受我哋嘅球迷愛戴,我哋需要佢喺最後三分之一嘅比賽做一啲特別嘅嘢,呢啲唔係戰術需要,而係天賦、個人天賦。」

迪布尼喺缺陣5個月後再戰英超,就帶領曼城反勝,佢話好掛住勝利嘅感覺:「我受咗重傷,需要時間去復原,我依家真係冇辦法踢足90分鐘,只可以踢30分鐘左右,但我好掛住、好享受勝利嘅感覺!」

曼城今場用傷癒嘅翼鋒杜古做正選,拍住貝拿度施華、科頓,正中鋒係祖利安艾華利斯,而紐卡素則由阿米朗、伊沙克同哥頓仔攻堅。

開賽僅2分鐘,曼城後衛基爾獲加就將對手嘅傳中波剷入自己龍門,雖然球證吹越位唔使擺老烏,但就剷傷咗門將艾達臣摩拉斯,呢位巴西國腳之後搞唔掂,卒之要由史堤芬奧迪加入替。

不過基爾獲加喺26分鐘將功補過,助攻畀貝拿度施華打開紀錄。紐卡素之後大反擊,喺35及37分鐘閃電二連發,由伊沙克、哥頓各建一功,迅速反超前2:1。

換邊後戰至69分鐘,奇雲迪布尼登場,佢只係上陣5分鐘,就喺禁區外勁射扳平2:2。補時階段,迪布尼長傳入禁區,由同樣後備上陣嘅20歲新星波比絕殺,贏紐卡素3:2,全取3分。

曼城目前20戰43分升上次席,僅落後榜首利物浦2分。至於紐卡素則喺英超4連敗,以21戰29分排第10。