英超車路士又和一場。今季餘下賽事已成例行公事嘅車仔，表現其實稍有起色，不過回歸史丹福橋後，仲未喺主場開齋嘅看守領隊林柏特，今場突然用番文迪打正選，最終因為呢位門將喺上半場犯錯，只能2:2與森林言和。
車路士今場又試陣，踢433陣式，門將用雪櫃兵文迪，左閘則有小將賀爾擔正，中場為安素、高華錫及干拿加歷查，前面三叉戟用馬杜基、史達寧及祖奧菲歷斯。
由於車路士餘下賽事都係例行公事，林伯試陣無可厚非，不過班球員淪落到榜下游，喺主場球迷面前，依然踢到漫不經心，的確令唔少球迷感到失望。
相反，森林要搏命護級，賽前排喺尾5，只比降班區領先2分，因此今仗決心十足，戰至13分鐘，洛迪將個波斬去中間湧，車路士門將文迪唔知係咪雪到硬晒，出迎時間極曳，造就森林大隻中鋒阿旺尼先開紀錄。
車路士嘗試反撲，但前線把握及組織力唔掂，最近磅嘅菲歷斯頭槌，亦被森林門神基羅拿華斯靚救沒收。
換邊後車路士瞓醒，史達寧先喺51分鐘於禁區內施射，省中對方守將入網；7分鐘後，呢位英格蘭國腳再喺左路發難，一cup一個妙射，收死拿華斯，助車路士反先。
以為林伯終於取得回歸後首仗主場勝仗，點知森林咁硬淨，僅4分鐘後，阿旺尼接應文加拉傳送，再次頂入扳平，最終雙方2:2，各得一分。
森林和波後，目前以34分排尾5，領先降班區的列斯聯、李斯特城3分及4分。餘下兩仗對手，分別為阿仙奴及水晶宮。
由於修咸頓主場吞富咸兩蛋，正式宣佈降班，另外兩支降班球隊，將不離森林、愛華頓、列斯聯及李斯特城。
