【英超】雙雄繼續W!曼城反勝 迪布尼入兩粒 自爆全靠科頓;阿仙奴穩陣贏 夏維斯刷新紀錄

阿仙奴、曼城繼周中快車後,周六英超又試先後出擊,結果曼城先喺早場以4:2反勝水晶宮;阿仙奴則喺壓軸戰以3:0輕取白禮頓,兩軍又齊齊開W,真係鬥到難分難解。

賽後阿仙奴31戰71分,以得失球差力壓同得71分、踢少場嘅利物浦升上榜首,而曼城就係31戰70分。利物浦周日晚10點半將會作客奧脫福,同曼聯合演雙紅會。

經過周中勒住小勝盧頓後,阿仙奴今場用番主力11人,夏維斯同薩卡、加比爾捷西斯攻堅,迪勤懷斯、佐真奴同奧迪加特喺中場拍住上。白禮頓傷兵唔少,由倒戈嘅韋碧克、安斯素擔大旗。

上半場初段,兩軍都有唔少入肉埋門,不過阿仙奴始終技高一籌,好快就企穩陣腳,32分鐘,阿仙奴射手加比爾捷西斯殺入禁區,林迪魯莽出腳被罰12碼,薩卡主射中鵠、先開紀錄。

換邊後阿仙奴進一步掌控大局,戰至63分鐘,佐真奴右路底線傳中,夏維斯搶點成功,射成2:0,之後呢位德國國腳喺完場前,又整球靚直線畀托沙埋齋,最終阿仙奴贏3:0完場。

夏維斯近期狀態大勇,今季更入咗9個聯賽士哥,刷新自己喺英超嘅入球紀錄,佢之前喺車仔,一季最多都係入得8球。

同晚早場,另一支爭標份子曼城憑迪布尼梅開二度、夏蘭特、域高路爾斯建功,作客以4:2反勝水晶宮,繼續咬到實一實。迪布尼今場唔單止光芒四射,原來更射入自己喺曼城生涯嘅第100粒士哥,相當厲害。

賽後迪布尼都保持謙虛,自爆自己有表現,全靠上場大演帽子戲法嘅科頓啟發:「因為佢呢啲咁出色嘅球員,令我保持警惕。一旦我表現唔好,好快就會被淘汰。科頓實在太勁,我同佢一齊踢波已經有7、8年,佢根本唔係年輕球員,而係超級巨星。」