世界盃前最後一輪英超，倫敦三巨頭命運迴異，阿仙奴進一步拋甩曼城固然開心，熱刺再一次80分鐘後熱血反勝，亦值得慶幸；而車路士0:1輸畀紐卡素唔意外，最令人失望嘅，係車仔完全失去勁旅風采，連組織一次攻勢都有困難，難怪賽後傳出樸達已聞魷魚香，隨時落鑊。
熱刺尋晚對列斯聯，陣容相對冇咁殘，雖然孫仔仲抖緊，不過李察利臣、古路施夫斯基已可出戰，拍卡尼攻堅，一對全能中場賓坦古亞、賀積查治繼續合作，而烏拉圭國腳賓坦古亞，亦成為今場主角。
有列斯聯嘅比賽例必精彩，上半場10分鐘，森馬維爾先開紀錄，之後英格蘭隊長卡尼一個極具級數嘅一挑一射扳平，完半場前洛迪高又入波，為列斯聯領先。換邊後熱刺熱血圍攻，賓戴維斯遠射改變方向，再一次扳平，去到76分鐘，洛迪高再一次展示射術，助列斯聯領先3:2。
呢個時候，絕殺魔王開始嚟料，賓坦古亞喺81分鐘一控一射追成3:3，兩分鐘後，呢位烏拉圭國腳伏兵門前，接應古路施夫斯基靚傳破網，熱刺最終贏4:3。今季已經係列斯聯第3次開總入球7+，上星期佢哋以4:3擊敗般尼茅夫。
較後時間，輪到車路士登場，作客新晉Big 7紐卡素。車路士今場正選陣容出人意表，波查擔任正中鋒，小將賀爾踢左翼衛，而且企位極度保守，上半場幾乎係零攻勢，而較主動嘅紐卡素，亦受制於對方嚴密防守，未能有效進攻，上半場悶和0:0。
下半場紐記睇準後開始發力，但車路士依舊冇料到，67分鐘，韋洛克接應弗到爆嘅阿米朗傳送，怒轟破網，落後下嘅車仔竟然只係位換位，奧巴美揚被雪藏，而夏維斯入替波查後攻勢係好番啲，但始終破門乏力，最終紐卡素小勝1:0。
紐記贏波後，以30分守住第3位，而車路士已錄3連敗兼全食白果，單計聯賽則5場不勝，同樣3連敗，目前只得21分排第8，樸達排陣及戰術再一次受到質疑，有傳狠辣班主保利已失去耐性，準備再次換帥，向勒夫、普捷天奴等名帥接洽。
