'

【英超】雙特教波好坎坷!林柏特創愛華頓最差紀錄 358日又玩完;邊個接手啱心水?

愛華頓近8聯賽輸足6場,跌到去倒數第二,周一晚官宣解僱領隊林柏特。上任358日又玩完,繼車路士後,「林伯」主帥生涯,再一次失敗收場。

被炒之前,林柏特領軍連續10場不勝,將身價總和高達4億歐元嘅球隊,帶至護級深淵。愛華頓今季踢咗20場聯賽,3勝6和11負,與修咸頓同得15分,僅以較佳得失球差,先至避免成為包尾大幡。

3日前,愛華頓作客對同樣成績差勁嘅韋斯咸,結果0:2落敗,成為壓倒林柏特最後一根稻草,對手領隊莫耶斯則藉呢場勝仗,暫時得保帥位。睇番數據,林柏特接手愛華頓後,教咗38場聯賽,只得到35分,以同樣場數,係愛華頓隊史上得分最少嘅教練,去到咁環境,唔炒先至唔合理。

除咗林柏特,佢嘅教練團成員亦連根拔起,愛華頓搵緊新主帥,前列斯聯領隊比爾沙、前般尼主帥戴治係熱門,擁有愛華頓DNA嘅朗尼,亦有機會重返母會。

球員時代,林柏特同謝拉特齊名,並列英格蘭兩大世界級中場,轉任領隊後,同時被寄予厚望。但事實證明,哥迪奧拿、施丹嘅成功例子,真係可遇不可求。

謝拉特喺蘇超,帶領格拉斯哥流浪成為聯賽冠軍,但一去到英超就出事,阿士東維拉以艾美利代替後,立刻重回正軌,高下立判。林柏特第一間執教嘅球會,係英冠打比郡,成績算唔錯。但高調重返車路士後,教一季半就執包伏,接替者杜曹用同一班球員,只用半季時間,已令車仔成為歐聯冠軍。

以雙特目前水平,如果要繼續執教生涯,應該去英冠或其他聯賽,畢竟英超水準非一般領隊可以應付,而且大部份班主老細要求即食文化,阿仙奴肯畀時間阿迪達慢慢執嘅例子,絕無僅有。畢竟連林柏特在內,今季已有6名英超主帥被炒。