謝拉特、林柏特同病相憐，成為被炒主帥熱門，好在旗下球員肯打場爭氣波，周六英超一齊迫和班霸，爆出冷門。維拉主場1:1迫和曼城，愛華頓打吡戰0:0和利物浦。
第6輪展開前，維拉1勝4負，而且表現麻麻，令謝拉特成為被炒次熱門，僅次於李城羅渣士。今仗爆冷得分，好大程度得助於曼城進攻欠銳，冇咗之前咁水銀瀉地。當然維拉球員亦好努力，例如37歲老將艾殊利楊格，剷截同頭槌解圍，都有100%成功率。
艾寧夏蘭特又入波，50分鐘為曼城取得個人第10個士哥，之後奇雲迪布尼罰球射中楣。維拉逃過一劫，末段大反撲，里安拜尼74分鐘為主隊追和1:1。
連對阿仙奴、曼城兩支豪門後，謝拉特有持續搶分機會，未作客車路士前，會對李城、修咸頓、列斯聯、森林，睇吓神奇隊長可唔可以把握到，逃出生天喇。
至於愛華頓，對利物浦前3和2負未開齋，今仗卻同紅軍踢出一場激烈打吡戰，互有大量入球機會。愛華頓快速突擊極出色，曾經有必入波中柱，又有入波僅僅越位食詐胡；
利物浦唔執輸，3次中柱中楣，兩隊龍門亦有多次神撲救，最終0:0打和，期間亦有爭議，VVD逃過紅牌劫。愛華頓實力有限，今場堅盡晒力，真心抵讚，但下仗又要作客阿仙奴，想爭今季首勝，睇怕仲要等等。
熱刺首度出哈利卡尼、孫興民拍李察利臣，未見特別效果，孫興民曾近射中柱，頭6輪仲未有入波。熱剌由賀積查治、哈利卡尼建功，主場2:1勝富咸，以14分同曼城並列第2。
最後講車路士，新老細用超過2億鎊買人，但開季表現大受劣評，上場輸畀修咸頓，更加不知所謂，領隊杜曹壓力，唔畀雙特細好多。
周六主場對韋斯咸，新加盟前鋒奧巴美揚未出住，另一剛轉會球員、7000萬鎊中堅科芬拿首度上陣，但車仔依然唔穩陣，62分鐘畀韋斯咸中鋒米查利安東尼奧先開紀錄，後備芝維爾76分鐘扳平。
臨完場先至係戲肉，87分鐘韋斯咸近門頂中柱，車路士大難不死，1分鐘後即由夏維斯射成2:1。補時2分鐘韋斯咸又入波，但被指侵犯門將文迪在先，慘食詐胡。有爭議嘅係文迪出迎時疑似撞落對手隻腳，韋斯咸衝門球員並冇犯規，車仔咁樣攞足3分，杜曹有運仔。
