近幾日，英國球圈有個話題，林柏特同謝拉特，邊個會先落馬？兩大英格蘭傳奇中場，任教球隊都處於低谷，面對好大壓力。
當然，有人比雙特更快玩完，0:9慘負利物浦後，柏加已被般尼茅夫解僱，成為新球季5大聯賽首個落馬主帥。柏加同雙特係同輩球員，更係同類型中場。早一輩英格蘭中場，最有代表性係白賴仁笠臣，教波成績亦有目共睹。
周三凌晨英超快車，愛華頓出盡飲奶力，雖然由安東尼哥頓先開紀錄，但實力所限，仍被主隊列斯聯迫和1:1，今季5戰3和2負，仍未打開勝利之門；林柏特近16仗只得4勝，未能改善極低勝率。
進功力弱係死症，李察利臣轉投熱刺，位置難以填補，安東尼哥頓夠快有技術，但唔係射手型，要等腳患馬卡維特利雲復出，情況先至可以改善。
謝拉特同病相憐，維拉近15仗只贏3場，新季除擊敗愛華頓，其餘3仗全敗，開鑼戰仲要輸畀般尼茅夫，今晚作客4戰全勝嘅阿仙奴，對手信心狀態超強，維拉再輸機會極高。雪上加霜，周日更要對曼城，連續兩仗輸少當贏，4連敗勢難避免。
計被炒壓力，謝拉特可能比林伯更大，維拉季前曾予外界一定寄望，依家踢成咁，謝拉特上場已經畀維拉球迷狂噓，反觀愛華頓，早已被睇死繼續護級，冇期望就冇失望。
同晚車路士繼續反覆，雖然史達寧先開紀錄，但之後完全被動，作客1:2負修咸頓。今季短短5輪，車仔已第2次落敗，而且係輸畀修咸頓、列斯聯呢類中型班，轉會窗仲有兩日，車仔再買唔到中鋒的話，睇嚟今季都唔使預佢哋爭標喇。
