英超嚟到第23輪，紐卡素先至輸今季第2場聯賽，但兩次對手都係利物浦，周六晚主場打少個，以0:2落敗，同時亦被紅軍追近積分，前4之爭轉趨激烈。
紐卡素之前唯一敗仗，係首循環作客晏菲路，仲要臨完場先失波，其餘賽事以超強防守力，成為極難被打敗嘅球隊，勢估唔到，今仗係死於防線問題上。
紐卡素開波即搶攻，但谷得太上，中後場露出好多進攻空間，利物浦最怕死守，多空位當然嗒晒糖，開波6分鐘已開紀錄，達雲紐尼斯接應隊友直傳，中路冇人緊纏下，近門射成1:0。
沙拿17分鐘移後交波，輕易劏開紐卡素中路，加普入楔時間恰到好處，利物浦領先到2:0。加普連續兩場有波入，同沙拿、達雲紐尼斯呢個新前鋒三叉戟組合，有漸入佳境之勢。
咁快輸兩粒已經不利，更致命嘅喺22分鐘出現，門將尼克普比走出禁區，原本想用頭槌解圍，點知判斷出錯落空，忙亂之下用手掂波，結果被罰紅牌出場，最大鑊係下周日聯賽盃決賽對曼聯，被視為今季英超最佳門將嘅普比要坐波監，防守力勢必大受影響。
雖然打少個，紐卡素下半場仍嘗試反撲，亦有黃金機會，但逃唔過艾利臣比加十指關，最終輸0:2，雖然仍排第4位，但比利物浦只多6分，兼且多踢1場。
紅軍經歷低潮後，連贏愛華頓及紐卡素，狀態回升之餘，傷兵亦陸續復出，中堅雲迪積克今仗已做番正選，周三凌晨歐聯16強，可以強勢迎戰皇家馬德里。
爭4更激烈，冠軍之戰亦峰迴路轉，阿仙奴今輪死過翻生，靠佐真奴完場前絕命一射，反勝維拉之時，曼城卻浪費無數機會，作客被森林迫和1:1，痛失兩分。
正如哥迪奧拿賽後講，曼城上半場已經應該入兩至三球，結果只有貝拿度施華能以世界波開紀錄。下半場除森林門將基羅拿華斯連環神救外，艾寧夏蘭特亦浪費咗黃金機會，埋下失分伏線。
84分鐘，森林前鋒基斯活特近門掃入，令曼城喺75%控球率、射門17:3嘅絕對優勢下，都只能和局終場。
一來一回，阿仙奴目前又比曼城多兩分，兼且少踢一場。下周六阿仙奴會作客李斯特城；曼城周四凌晨歐聯先對RB萊比錫，周六晚作客般尼茅夫。
