'

【英超】阿仙奴KO熱刺!真大佬沙加Call隊友圍圈振士氣 3年耕耘 過街老鼠變寵兒

3年,可以有翻天覆地嘅改變,城市如是、球員亦如是。阿仙奴尋晚以3:1擊敗熱刺,8戰7勝1負繼續佔據榜首,柏迪世界波、加比爾捷西斯持續穩定,而官方MVP亦係耶穌仔,不過喺唔少阿仙奴球迷心目中,今場MVP應該係沙加。

阿仙奴今場繼續強陣出擊,3位冇為巴西出戰國際賽嘅加比爾,絕對係抖足搏殺,戰至20分鐘,湯馬士柏迪一球超級世界波,為阿仙奴打破僵局,不過熱刺嘅反擊堅有效率,31分鐘,李察利臣喺禁區內被加比爾馬加斯侵犯,博到12碼,卡尼一針見血,扳平1:1完上半場。

換邊後,阿仙奴繼續醒神,薩卡仔右路抽射,熱刺門神洛里斯擋出,耶穌仔上前執雞,阿仙奴再度領先,之後熱刺艾馬遜一吓肉酸落腳,侵犯馬天尼利而食紅牌,10人應戰下更無力翻身,由「真大佬」沙加埋齋,3:1完場。

點解會叫沙加係真大佬?佢今場繼續有高水準發揮,喺柏迪同辛真高包底下,沙加完全演活咗鎖匙人角色,派牌、控制節奏均屬一流,雖然第一個失波佢係有啲責任,但佢好快就平復到,而講到今場佢最搶鏡嘅一幕,唔係推過艾歷迪亞射遠柱建功,而係喺阿仙奴入第一球後,即刻召集隊友Team Talk,振奮士氣。

阿仙奴大部份球員都係2字頭,作為少數嘅3字頭其中一員,沙加依家雖然已經唔係隊長,但就肩負起激勵、安撫隊友情緒嘅大佬,如果無咗佢,阿仙奴一班後生仔嘅攻守,未必可以咁流暢有道。

時間返番去2019年10月底對水晶宮,當時嘅阿仙奴陷入低迷,格列沙加表現極曳,佢同佢嘅家人,成為球迷網上攻擊嘅對象,佢被換離場嗰陣掟隊長臂章、叫球迷噓佢噓得大聲啲,仲疑似講粗口鬧球迷,佢去到場邊時連隨除低埋阿仙奴波衫,期間噓聲不斷,自此,原本係隊長嘅佢正式被褫奪隊長資格,同球迷關係跌至冰點,離隊幾成定局。

「我老竇同我講,係時候走喇,我行李都執好。」12月底,阿迪達啱啱上場,沙加話:「我準備好同阿迪達道別,然後上飛機,展開新生活。」點知,就係阿迪達,令佢嘅決定有所改變。

當其時嘅沙加,已經係過街老鼠,受盡球迷、名宿、球評家等等嘅指罵,只待1月就走人,但阿迪達上場後,竟然向佢作出挽留:「畀半年時間我,到7月轉會窗重開,到時你仍然想走嘅,我唔會阻你。」

「我好愛呢間球會,就咁走咗去,係好唔甘心。」結果,阿迪達成功打動咗佢,而沙加亦變得低調,笑罵由人,位置角色上嘅小轉變,加上佢3年嚟嘅努力,球迷眼神係雪亮嘅,依家嘅沙加,雖然冇咗隊長臂章,但所有阿仙奴球員,都當佢係大佬,而球迷,亦喺早前對賓福特高唱「沙加之歌」。

由過街老鼠變為球迷寵兒,沙加用表現說話,聽到「沙加之歌後」,佢亦特別喺官網出片多謝阿迷:「聽到你哋嗌我個名,為我唱歌,好感動,多謝你哋!」