【英超】阿仙奴3:1贏利物浦 落後2分 爭標三雄鼎立!兩個世界級守將出錯 高普認抵輸

星期日下畫睇完「美欺騙案」,精彩絕倫,夜晚英超冇花冇假,利物浦作客負阿仙奴1:3,連紅軍領隊高普賽後都承認,球隊表現未夠好,阿仙奴呢3分絕對值得落袋。

「恭喜阿仙奴。」高普好直接:「今日我哋表現得唔夠好,本來希望1:1追平後會有一番作為,但我哋整場比賽都冇射門中框,畢竟我班細路只係人,我哋都只係人,改變唔到呢個情況。」

高普安慰一臉落寞嘅VVD。

賽前有加比爾捷西斯受傷消息嘅阿仙奴,改派夏維斯打「假9」。利物浦有剛喪父嘅小將干拿巴特利、腿筋拉傷嘅中場蘇保斯拿爾避戰;由迪亞高祖達、路爾斯戴亞斯同加普組成三叉戟。

阿仙奴喺14分鐘開紀錄,奧迪加特快傳,無人看管嘅夏維斯單刀射門,雖然被艾利臣比加擋出,但薩卡補中,阿仙奴領先。完半場前,冇乜射過門嘅紅軍,藉加比爾馬加希斯喺混戰中擺烏龍扳平。

換邊後,輪到利物浦回禮,雲迪積克同出迎嘅艾力臣比加誤會,大家都清唔到個波,益晒馬天尼利射入空門,阿仙奴再度領先2:1。落後下嘅利物浦反撲無力,88分鐘,干拿迪兩黃一紅,補時托沙表演錦上添花,利物浦以1:3落敗,聯賽4連勝告終。

阿仙奴領隊阿迪達開心到癲,認為呢場係今季爭標關鍵一戰,又大讚一班手足有料到:「我揀唔到邊位球員踢得最好,佐真奴拎咗MOTM,我戥佢開心,但其實佢只係反映咗其中一個例子。」利物浦23戰51分榜首,阿仙奴23戰49分緊隨其後,仲有曼城打少兩場有46分,今晚深夜會對賓福特。