唔經唔覺，阿迪達執教阿仙奴，已經有167場，周日晚作客3:0大勝富咸，係呢位少帥第100場勝仗，抵達里程碑，繼續向聯賽冠軍進發。
相對曼城前一晚辛苦到暈，只靠艾寧夏蘭特完場前射入12碼，先至以1:0險勝水晶宮，阿仙奴今仗贏得清脆，上半場已入晒3球，繼續以27戰66分居榜首，5分領先曼城。
2月16號不敵曼城後，阿仙奴火速回升，聯賽5連勝，而且好事不斷，兩名冬季轉會窗加盟嘅球員，證明非常啱用，成為下半季衝刺爭標強力武器。
意大利中場佐真奴唔係必然正選，但出親都有表現，做足攻守樞紐角色。比利時翼鋒李安度杜沙特更特別，近期被安排客串正中鋒，側邊配布卡約沙卡、加比爾馬天尼利，效果出奇咁好。
雖然自己冇波入，但李安度杜沙特今仗上半場完成助攻帽子戲法，餵波畀加比爾馬加希斯、加比爾馬天尼利、馬田奧迪加特建功，成為英超歷史上，首位作客半場即助攻戴帽嘅球員，亦係09年10月法比加斯之後，首位上半場助攻戴帽阿仙奴球員。
自從冬窗以2700萬鎊由白禮頓轉投阿仙奴後，杜沙特各項賽事出場10次，貢獻1球5助攻，成為兵工廠助攻王。
77分鐘，阿仙奴擁躉見到更興奮場面，加比爾捷西斯養傷多時，終於以後備身份復出。有番耶穌仔做正中鋒，阿仙奴前線更完整、有更多進攻瓣數，繼續向聯賽冠軍邁進。
