周日晚英超，阿仙奴作客輕取賓福特3:0，繼續坐穩榜首。見場波贏梗，領隊阿迪達補時換入只得15歲球員拿華里（Ehtan Nwaneri ），打破英超最年輕上陣紀錄。
葡萄牙年輕中場法比奧韋拉，由波圖轉投阿仙奴後，喺英超首度出任正選，代替受傷嘅奧迪加特，負責策劃及支援進攻，表現出色加埋有波入，絕對係一個成功嘅英超地標戰。
中堅沙列巴接應角球頂入，17分鐘阿仙奴已開紀錄，28分鐘加比爾捷西斯又係頭槌建功，半場領先2:0。賓福特反攻欠威脅，49分鐘更被法比奧韋拉遠射建功，阿仙奴贏夠3:0，餘下賽事穩穩陣陣，輕鬆攞3分，繼續7戰18分排榜首，曼城、熱剌同得17分。
法比奧韋拉只有22歲，但補時入替佢嘅拿華里，就真係超後生，2007年3月21日出生，15歲181日。之前紀錄保持者係利物浦中場艾利洛，16歲60日。
由於喺U18表現出色，拿華里本賽季被提升到U21，好快又得到同一隊練波嘅機會。阿仙奴對小朋友過去呢一年嘅巨大進步感到興奮，阿迪達希望用呢種方法激勵拿華里，令呢位年輕人明白自己距離一隊並唔遙遠。
阿仙奴榜首不變，同日另一仗就係榜末戰役。踢到第7場，愛華頓終於贏波，主場1:0險勝韋斯咸，阿根廷裔法國前鋒馬奧比，取得加盟後首個入球，令愛華頓以1勝4和2負升上第13位；韋斯咸4分排倒數第2，莫天才今季有排執，唔好再諗歐洲賽事參賽資格，脫離榜尾位置先喇！
