又係苦戰！阿仙奴周二凌晨作客水晶宮，只憑12碼險勝1:0，後半段打少個更幾乎失分。贏波之後，只有佢同曼城、白禮頓，係英超新球季2連勝球隊。
阿仙奴新加盟後衞添巴，開鑼戰即受重傷有排抖，辛真高又未夠狀態，左閘用富安建洋做正選，繼續將湯馬士柏迪移後打右閘。面對水晶宮唔算強勁嘅鋒力，除開波初段有少少混亂，基本上頂得住。
馬田奧迪加特、迪勤懷斯、夏維斯3人中場線，慢慢控制戰局，製造有威脅攻勢。先有薩卡射中柱，尼基迪亞挑射空門高出，上半場互交白卷。
54分鐘，尼基迪亞禁區內被門將拉跌，球證判12碼，奧迪加特主射破網。阿仙奴領先後控制戰局，形勢本來大好，但富安建洋67分鐘兩黃一紅被逐離場，令戰局隨即逆轉。
水晶宮呈圍攻之勢，好在對手攻門板斧有限，加上阿迪達調動果斷，加比爾、佐真奴、辛真高、基維柯先後落場，換走攻擊球員，最終保住勝果。
雖然開季兩連勝，但今仗同上周贏森林2:1，阿仙奴都係贏得辛苦，雖然迪勤懷斯勁搶鏡，今場更當選MOTM，但阿迪達仍有兩個問題要解決。先係湯馬士柏迪客串右閘，防守當然問題唔大，但較少邊路助攻，令薩卡缺乏支援。
仲有轉會費7000萬鎊嘅夏維斯，踢番老本行中場，走動頗多，而且功能性十足，臨完場前充當柱躉緩解壓力，但於進攻上未見起大嘅化學作用，尤其同馬天尼利嘅磨合仍有待完成。
攻力未全面發揮，場場踢得咁辛苦都唔係辦法，睇吓周末主場對富咸，阿仙奴可唔可以輕鬆啲。
