成功復仇！今晨英超補賽，阿仙奴主場4比0大炒愛華頓，拋甩曼城5分，一吐上個月被愛華頓擊敗嘅烏氣。最重要係杜沙特來投後，達Sir研發出一條煞食Form，捽番醒馬天尼利，有料！
馬天尼利早輪陷入低潮，杜沙特加盟之後，有唔少聲音提議佢踢正選，取代小天馬，不過阿迪達就更高明，二人同時登場，一個正箭頭，一個左翼，仲要時不時換位，令敵軍無所適從。
阿仙奴早段面對愛華頓，其實未算有太大優勢，戰至40分鐘，薩卡仔禁區內窄角度狂抽破僵局，之後即時順晒，上半場補時，薩卡仔再逼搶成功，馬天尼利單刀射成2比0。
愛華頓進退失據，換邊後阿仙奴控制戰局，71分鐘，奧迪加特接應杜沙特傳中射成3比0；80分鐘，小天馬搶點搞掂，阿仙奴大勝4比0、成功復仇。
馬天尼利今季英超入咗11球，而以超過20萬鎊周薪續約嘅薩卡仔，則有10球進帳，絕對物有所值。二人爆發，亦令阿仙奴成為今季第一隊有兩位球員入球達雙位數嘅球隊。
除咗一對翼，中場奧隊亦已入9球，加上加比爾捷西斯、史密夫路維即將復出，辛真高切入中路派牌越嚟越成熟、柏迪及佐真奴輪換效果理想，小天馬、杜沙特換位戰術亦煞食，目前阿仙奴與曼城同為25戰，阿仙奴Lead住5分，下場對手係般尼茅夫，而曼城則要對紐卡素。
同晚補賽，先後大敗予皇馬、悶和水晶宮嘅利物浦，憑雲迪積克、沙拿建功，主場以2比0擊敗狼隊，全取3分後升上第6位，重燃爭前4希望。
今場波半場雖然只係0比0，但利物浦形勢佔優，66分鐘，傷癒後狀態漸起嘅祖達中路狂奔，如入無人之境，去到禁區內跌低，達雲紐尼斯把握機會破網，但VAR爭議性地判詐胡。
好波始終有好報，73分鐘，VVD藉角球攻勢先開紀錄，4分鐘後紐尼斯策動快速反擊，由穆罕默德沙拿射入，最終以2比0勝出。連埋今場波，沙拿已連續6季入球達20球或以上，數據驚人。
目前利物浦24戰39分，落後第四位嘅熱刺6分但少踢一場，爭前四仲有價講。呢場勝仗，亦畀球迷睇到利物浦正在復甦當中，嚟緊周日深夜雙紅會鬥曼聯，大把好戲睇。
