【英超】阿仙奴升榜首!夏維斯後備登場 絕殺賓福特;阿迪達:佢笑對逆境 係我哋榜樣!

爭番口氣!阿仙奴周日凌晨英超尾場行尾運,由後備入替嘅夏維斯頂入絕殺球,作客1:0挫賓福特,登上榜首!

夏維斯季初一直係正選,但毫無表現,領隊阿迪達備受批評,點解要用咁多錢買佢,今場呢位德國國腳終於做英雄、一吐烏氣,阿迪達賽後特別拉住夏維斯,同佢走到客軍球迷區,向阿仙奴球迷致意。

賽後記招,登上榜首嘅阿迪達話:「我好開心,喺咁凍嘅天氣嚟到賓福特,真係好難踢,我感受到阿仙奴球員極强嘅鬥心,全力以赴,踢好一場我哋必須贏嘅比賽,我哋完全值得呢場勝利!」

「當然,夏維斯呢球波真係好有意義。每個隊友都攬住佢,話畀佢知我哋有幾愛佢,因為佢喺困難時候嘅表現,係我哋所有人嘅榜樣:冇放棄、一直戰鬥到最後,佢終於有回報,所以佢去迎接美好時刻(與球迷致謝互動),我哋特別開心!」

阿仙奴今仗排出進取陣容,加比爾捷西斯、馬天尼利、薩卡組成鋒線,托沙墮後與奧迪哥特組織,夏維斯列後備。另由於倒戈條例,借將拉耶未能披甲,要由藍斯度擔正把關,但此子未有好表現之餘,14分鐘更幾乎出事,控球太耐下被搶甩,安保姆把握機會施射,好在迪勤懷斯護空門。

完半場前,耶穌仔頭槌攻門被撲出,托沙補中但被判越位。賓福特亦有絕佳機會,下半場安保姆傳畀慕比施射,好彩施真高護空門。阿仙奴大難不死有後福,後備登場嘅夏維斯,完場前接應傳中頂入,以1:0擊敗賓福特,阿仙奴13戰30分升上榜首。