呢場真心癲，阿仙奴主場唔夠10秒即失波，跟住仲要落後至0:2，去到補時8分鐘，由後備雷斯尼爾遜射成3:2，超級逆轉擊敗般尼茅夫，仍以5分力壓曼城。
較早前曼城2:0挫紐卡素，令曾經落後兩球嘅阿仙奴壓力更大，但球員頂得住，尾段連入3球反勝，展示爭標強隊特質。青訓產品雷斯尼爾遜大傷過後甚少出場機會，但今仗後備上陣，除助攻扳平外，補時更奠定勝局，打出身價。
今場般尼茅夫中圈開波，立刻發動右路攻勢，奧烏達拿傳中，阿仙奴後衞仲未瞓醒，畀菲臘標寧近門射入，極速落後，令呢場非勝不可嘅硬仗更難打。
入波之時，電視直播畫面，連計時器都未趕得切放出，實際入波時間，般尼茅夫官方網頁話係8秒，OPTA統計則為9.11秒，係英超史上第二快入球，僅次於沙恩朗2019年4月修咸頓對狼隊時，開場7.69秒嘅士哥。
阿仙奴落後咗都未知乜事，唯有全力反攻，上半場控球率高達83%，徹底一面倒，但真正極具威脅嘅埋門欠奉，般尼茅夫反而有個單刀，全靠蘭斯達爾神救先至唔駛輸多球。
今仗阿仙奴由杜沙特打中鋒，但呢位比利時國腳23分鐘已因傷被換出，由啱啱好番嘅伊美路維入替。兩個中鋒加比爾捷西斯、尼基迪亞都養傷，依家加多個杜沙特，阿迪達真係頭都大埋。
踢到57分鐘，阿仙奴更落後至0:2，雖然湯馬士柏迪62分鐘扳回一球，但主場失分機會仍高，直至69分鐘，領隊阿迪達一個調動，將球隊命運徹底扭轉。
伊美路維被換走，由雷斯尼爾遜入替，呢位23歲翼鋒出場只有一分鐘，即於左路傳遠柱，由另一後備賓韋特助攻射入，取得佢加盟阿仙奴後第一個士哥。
之後阿仙奴一直狂攻，但總係差些少，VAR亦多次出現爭議，以為阿仙奴點都要跌兩分之際，補上補去到97分鐘，尼爾遜接應角球，禁區邊勁抽掛網，3:2！呢位年輕英格蘭翼鋒，一手將球隊由地獄帶上天堂。
之前曼城被紐卡素狂攻，哥迪奧拿換走奇雲迪布尼，貝拿度施華入場1分鐘即入波，帶球隊走出困局；阿迪達亦以一個神調動，令阿仙奴完成大逆轉，兩師徒今季勢必由頭鬥到尾，好睇到爆！
