【英超】阿仙奴作客贏1:0 做足本份;曼聯連敗 被車仔過頭 朗尼:球員唔似為坦克而戰

雖然紅魔想做攔路攔路虎,但真係有心冇力。阿仙奴周日作客奧脱福,以1:0小勝曼聯升上榜首,靜待周中熱刺主場對曼城,呢支倫敦宿敵會幫到手。

阿仙奴目前37戰86分,只剩下周日煞科日主場對愛華頓。曼城落後1分,但仲有兩場喺手,最關鍵當然係周三凌晨作客熱刺,若然全取3分,最後一仗主場對韋斯咸,贏面高到爆,大可實現4連霸。但熱刺仍有機會同維拉爭歐聯席位,對曼城必定搏盡,睇吓可唔可以幫到自己之時,順便益埋阿仙奴。

至於又輸波嘅曼聯已跌落第8位,36戰57分,較同比賽場數嘅紐卡素、車路士少3分。佢哋3隊都剩兩場,如果形勢不變,足總盃決賽又輸埋畀曼城,曼聯會連歐協聯資格都冇埋,到時唔炒坦哈格,相信都交代唔到。

名宿朗尼賽後亦批評曼聯球員冇盡力:「如果睇表現,我唔覺曼聯班球員為坦哈格而戰,即使係隊中最優秀嘅球員,表現都係低於標準。我希望佢哋可以畀坦哈格更多時間,因為轉會工作存在好多問題,而且係多年積累嘅問題。」

上仗恥辱性吞水晶宮4蛋,受盡批評,但曼聯始終多傷兵,今仗仍焗用卡斯米路做中堅,搭住莊尼伊雲斯,中場靈魂般奴費南迪斯仍然養傷,令情況雪上加霜。連安拉拔、迪亞路查奧爾等千年後備,都要正選上陣。

即使係咁,曼聯開波初段,喺加拿祖活躍演出帶動下,其實個勢唔錯,可惜去到20分鐘,奧拿拿長傳,畀阿仙奴喺中後場截到,放直線去右路夏維斯,曼聯防線最後一個係卡斯米路,佢懵盛盛冇跑前裝越位,畀夏維斯輕鬆推落底線傳中,托沙近門撞射入網,阿仙奴領先1:0。

阿仙奴領先後較為保守,曾經畀曼聯壓住嚟踢,但冇咗般奴費南迪斯,紅魔進攻組織有限,最有威脅始終係加拿祖,但佢幾次個人突破,雖然有威脅,但未能製造入球。比賽末段,阿仙奴乘對手力度減弱,幾次進攻都幾乎拉開紀錄,全靠奧拿拿精彩撲救,曼聯先至冇多失,最終主場輸0:1。