周日英超9點3連環，重頭戲白禮頓對利物浦，雙方頻頻犯錯，最終沙拿梅開二度下，利物浦作客以2:2賽和白禮頓，落後榜首熱刺3分。
利物浦周中喺歐霸盃以2:0輕取聖基萊斯聯，加上上仗畀球證趕咗兩件出場，所以今場陣容有些少變動，由戴亞斯、沙拿同紐尼斯組合三叉戟，中場出動新黃金組合蘇保斯拉爾、麥卡里士打拍住艾利諾；至於白禮頓則有三笘薰、祖奧柏度及伊雲斯正選。
今場波雙方防線都有失誤，20分鐘，雲迪克冇留意麥卡里士打被3名白禮頓球員包圍，照畀波佢，結果被阿迪加搶到個波，再嚟個遠射，呢球角度唔算刁鑽，力度亦都唔係太大不大，但已足夠收死艾利臣。
失咗呢球之後，利物浦連續5次作客，都係先失波嘅一方。由2022-23賽季到依家，利物浦已因失誤被直接轟入9球，而本季英超，利物浦上半場失咗7球，僅次失9球嘅般尼茅夫同般尼。
第40分鐘，輪到鄧克犯錯，佢傳波被前隊友麥卡里士打搶到，利物浦隨即反擊，紐尼斯巧妙橫傳，沙拿輕鬆掃個波入網，利物浦扳平1:1。
4分鐘後，到白禮頓門將雲布根送禮，傳波唔湯唔水，蘇保斯拉爾截到個波後突破，哥斯焗住拉人犯規，球證安東尼泰萊判罰12碼，但就冇出示黃牌或紅牌，沙拿操刀搞掂，利物浦反先2:1完半場。
換邊後互有攻守，53分鐘，蘇保斯拉爾右路傳個靚地波，但格雲貝治面對空門，竟然一嘢射落條橫楣度，未能拉開紀錄，埋下失分伏線。結果喺第78分鐘，蘇利馬治左路開罰球，鄧克將功補過，幫白禮頓逼和對手2:2，執番1分。
值得一提嘅係，今場紐尼斯交出助攻，係佢嚟到利物浦後嘅第5次，而呢5次助攻，入球者都係沙拿。利物浦鋒線同中場都成功換血，高普都要諗諗條防線喇。
