形勢逆轉！周三深夜英超榜首大戰，阿仙奴後防不斷犯錯，最終喺主場以1比3不敵曼城，徒弟阿迪達由8月坐到依家嘅榜首位置，被師傅哥迪奧拿正式搶走。
阿仙奴近態下滑，之前連續兩場失分，分別輸畀愛華頓同打和賓福特，嚟到今仗賽前又收到壞消息，中場核心柏迪肌肉受傷缺陣，由佐真奴頂上，戰力打折，而達Sir勝利11人另一個變動，就係用富安健洋取代賓韋特，擔任正選右閘。
偏偏第一個出事嘅，就係富安健洋。24分鐘，呢位日本國腳自殺式回傳，點知畀奇雲迪布尼截到，乖巧笠入。阿仙奴之後憑一個有爭議性嘅12碼，由布卡約薩卡扳平。
下半場阿仙奴控球唔少，而尼基迪亞其實亦有數次黃金餐士，但質素分野成為勝負關鍵，72分鐘，加比爾馬加希斯傳球失誤，曼城即打反擊，由基亞利殊射入。10分鐘後，曼城再逼搶得手，夏蘭特控完再轉身快射，盡顯世界級中鋒級數，最終曼城贏3比1。
目前曼城喺踢多一場嘅情況下，與阿仙奴同得51分，曼城以較佳得失球升上榜首。英超史上，第3次出現第2名喺下半季贏第1名後，搶走榜首位置，之前兩次，後上嗰隊都順利逆轉封王，分別係2010年4月車路士贏曼聯、2012年4月曼城贏曼聯。
阿迪達賽後直接表達對球員嘅不滿：「我哋平均表現唔錯，但係喺呢種水平嘅比賽，犯錯係唔能夠接受。而我哋竟然送咗3球畀對手，自己又把握唔到機會。」
尼基迪亞嘅不濟，令唔少槍迷更掛住多功能耶穌。加比爾捷西斯自世界盃後一直缺陣，日前終傳嚟好消息，教練團隊po咗段耶穌仔單獨跑步嘅片，有指呢位巴西國腳，最快2月底可以復出。
