又是根度簡，已經32歲，依然越戰越勇，去到季尾，更進入無可抵擋境界。曼城周日作客3:0輕取愛華頓，這位德國防中兩射一傳，成為星中之星，閃耀全場。
11年前的5月14日，母親節，曼城聯賽煞科戰對昆士柏流浪，加時3分鐘由阿古路射入致勝球，力壓曼聯奪得44年來首個聯賽冠軍，奠定之後雄霸英超之路。
這場比賽，對曼城以至整個英超、甚至是球壇，都是永恆經典，如果當晚有看直播，相信會畢生難忘。
11年後的母親節，曼城未有讓第7次成為英超冠軍的優勢溜走，雖然收起奇雲迪布尼、貝拿度施華，留力周四凌晨對皇馬的歐聯4強次回合，但要攻破拖肥糖，依然綽綽有餘。
上半場已入兩球，最大功臣又係根度簡，對手攻力弱，32歲德國防中全面參與進攻，37分鐘背向龍門挑射入網固然精彩，39分鐘左路又放出精準傳中，艾寧夏蘭特頭槌勁頂破網。
根度簡上場對列斯聯，如非12碼宴客，已經連中三元，今仗再次是他的世界，上半場一傳一射未滿足，51分鐘又有士哥，今次是一個自由球，彎過人牆直飛網窩，愛華頓門將比克福特鞭長莫及。
曼城贏波後，領先同是35戰的阿仙奴4分，餘下3仗對手分別是主場對車路士、作客白禮頓及作客賓福特。
愛華頓上仗作客大炒白禮頓，只是對手突然失準，面對最穩健的曼城，立即打回原型，仍居倒數第4（36戰32分），領先列斯聯（36戰31分）、李斯特城（35戰30分）。包尾的修咸頓，今輪主場0：2不敵富咸，提早宣布護級失敗，下季降落英冠。
