'

【英超】開鑼喇!阿仙奴2:0贏水晶宮 一個進步超明顯!

英超返嚟喇!周六凌晨先嚟一場獨腳戲,阿仙奴喺少少運氣加持下,作客2:0打敗水晶宮,總算冇令擁躉失望,阿迪達亦藉此得到帶領兵工廠第50場勝仗。

作為熱身賽之王,唔計閉門作賽,5仗入20球失4球,阿仙奴季前好表現,令唔少擁躉對新賽季充滿憧憬,起碼更有力爭取前4席位。阿迪達今仗用番喺熱身賽夾好嘅陣容,前面係新兵加比爾捷西斯、馬天尼利、薩卡仔,另一新兵辛真高出任正選左閘,而中堅拍檔係加比爾同沙列巴。

睇過熱身賽,就知阿仙奴狀態谷起咗,揭幕戰一開波就壓住水晶宮嚟攻,兩個Gabriel 喺鋒線好活躍,4分鐘加比爾捷西斯已製造黃金機會,但加比爾馬天尼利未能把握,近門射斜。腳唔得?用頭喇!20分鐘,阿仙奴開出角球,辛真高遠柱頭槌二傳,馬天尼利近門補多頭頂入,打開紀錄。

入波後,形勢慢慢逆轉。水晶宮雖然實力稍遜,但喺舒侯斯公園狹窄細場,憑硬淨兼直接快速打法,令好多強隊都怕咗佢,上季就曾經喺主場以3:0打爆阿仙奴,當時真係搞到兵工廠謝晒。

水晶宮全面反攻之下,韋費特沙夏、佐敦阿休製造唔少威脅,阿仙奴龍門蘭斯達爾作出兩次關鍵撲救,賓韋特、加比爾馬加希斯、沙列巴亦總算頂得住,尤其係外借成材回收嘅沙列巴,包波攔截極為出色,助兵工廠化險為夷。

雖然取得主動,控球率亦超越50%,但水晶宮喺85分鐘輸多球烏龍波,宣告死刑。薩卡仔右路傳中,水晶宮中堅馬克古希想頭槌解圍,但反而擺烏龍,主隊輸至0:2,主場9場不敗走勢終止。

相對上季開鑼3連敗,今季打響頭炮,阿仙奴有個好開始。作客水晶宮從來唔易踢,今仗冇喺對手持續強攻下崩潰,中後場抗壓力比上季大有進步。

開鑼戰贏波固然高興,阿迪達亦得到加盟阿仙奴之後第50場勝仗。喺球會歷史上,佢係第2快達到呢個里程碑嘅阿仙奴領隊,用咗98場。第1快當然係雲格,比阿迪達快4場。阿仙奴下仗賽程,係下周六主場對李斯特城。