【英超】重擊曼城!卡尼登基熱刺射手王 挑戰英超最偉大紀錄;阿迷:開P要預埋佢

一日槍手、一世槍手!本輪英超壓軸大戰,熱刺由卡尼一箭定江山,主場以1比0擊敗曼城,令本周全失3分嘅阿仙奴,可以暫時鬆一口氣。

曾經係阿仙奴青訓一員嘅卡尼,賽後當然被唔少球迷拎嚟講笑,不過認真mode嚟講,卡尼呢個士哥創下2大紀錄,除咗登基熱刺史上入球王,嚟緊仲會挑戰成為英超最偉大射手!

曼城對上4次作客熱刺都輸波,往績唔老黎,但點都希望搶晒3分,祖利安艾華利斯同夏蘭特雙箭齊發,仲有基亞利殊同馬列斯,相當進取,可惜去到15分鐘,洛迪卡斯簡迪犯錯,被賀積查治截到個波再傳畀走靚位嘅卡尼,輕鬆開紀錄。

完半場前,馬列斯有球抽射中楣,下半場亦大部分時間壓住熱刺嚟攻,但搞唔掂熱刺血肉長城,夏蘭特自2020年9月(多蒙特時期)後,首次錄得0射門,甚至乎0次喺熱刺禁區內掂波。熱刺中堅羅美路尾段雖然被逐,但曼城都搵唔到入波,最終輸0比1,仍然落後阿仙奴5分兼踢多一場。

卡尼呢個士哥,係佢個人喺英超第200球,令佢成為舒利亞(260球)和朗尼(208球)之後,第3位200+ Goal手,而佢各項賽事累積為熱刺射入267球,亦超越名宿基夫斯,成為熱刺史上射手王。

卡尼賽後話:「呢個係好奇妙夢幻嘅時刻!用勝利配合紀錄!能夠喺主場球迷面前達到呢個里程碑,我呢世都唔會忘記!」

領隊干地因上周做膽囊切除手術,依家正喺意大利養病,完場後即刻打畀卡尼恭喜佢,之後再喺IG留言:「就算身在遠方,心仍然同你哋一齊,熱刺令我感到光榮。」

卡尼一箭定江山,亦直接重擊曼城衛冕夢,有球迷講笑話卡尼曾參加槍手青訓,如果最終兵工廠奪冠,要請埋呢位功臣開P!更有槍迷upload卡尼細個著阿仙奴波衫嘅相:「卡尼,一日槍手,一世槍手。」