阿仙奴連勝斷纜！曾經落後1球、但一度反先2:1兼踢多一個，可惜最終都要失分…阿仙奴周六英超只能以2:2賽和富咸，3戰過後獲得7分。
與曼聯同時間開波，同樣先落後，曼聯仲要係落後兩球起步，大家都有12碼，兩軍敵方都踢少個，但曼聯就大團圓結局反勝3:2，而阿仙奴則要擺低兩分離場……下個禮拜，阿仙奴就會喺主場對曼聯。
英超嚟到第三周，爭標熱門之一嘅阿仙奴主場出擊，迎戰富咸。阿仙奴前兩周比賽順利贏波，總算開個靚頭。嚟到今場，阿仙奴繼續玩陣式，基維奧、湯馬士柏迪分別串演左右閘，中場迪勤懷斯、奧迪加特同夏維斯，前線馬天尼利、薩卡支援假9杜沙特。
睇個陣就好凶狠，但開波唔夠1分鐘，連續83次為阿仙奴上陣、破咗球會紀錄嘅薩卡送大禮，喺中圈附近回傳唔湯唔水，富咸中場安達斯彭利拿多謝都冇句，一路推進搞掂先開紀錄。
據opta統計，阿仙奴創咗個尷尬紀錄，就係佢哋係英超史上，首支喺一年內嘅主場比賽，曾3次唔夠1分鐘就失波嘅球隊，另外兩次分別係3月3:2反勝般茅、4月時3:3逼和修咸頓。
阿仙奴落後下全面圍攻富咸，僅上半場就已有8次射門，控球比率接近7成5，但真正極為入肉嘅攻勢唔算多，當中奧迪加特曾喺禁區頂冷箭破網，可惜夏維斯越位在先。
換邊後，倒戈嘅利奴繼續穩健，阿仙奴點都搵唔到入波方法，達Sir嚟個靚調動，尼基迪亞、法比奧維亞拿先後入替，結果70分鐘，維亞拿博到12碼，薩卡操刀、將功補過扳平，僅2分鐘後，維亞拿再傳靚波，尼基迪亞快腳搞掂，阿仙奴反先2:1。
第二球入波，當其時富咸係有球員受傷倒地，不過連富咸隊友都冇踢出界，就好難怪阿仙奴趁機入波喇。
之後富咸中堅奇雲巴斯兩黃一紅，阿仙奴諗住食硬啦，點知又嚟個反高潮，富咸憑角球攻勢、祖奧柏連夏入波扳平2:2，阿仙奴之後再次狂攻，但利奴今仗表現神勇，一一化解攻勢，最終雙方各得一分。
夏維斯今仗繼續0威脅，至於迪勤懷斯則持續交到貨，96%傳球成功率，6次地面對抗5次成功、5次長傳4次成功，1億鎊抵畀。
