畀人笑屎波？用行動證明人哋錯囉！利物浦喺社區盾以3:1挫死敵曼城，英超開季先聲奪人，第一功臣係達雲紐尼斯，兩軍新中鋒首度對決，表現完勝艾寧夏蘭特。
雖然只係社區盾，但曼城對利物浦喎，兩隊都排最強陣容出戰，都係咁快上快落，幾時都咁高汁，質素保證。
曼城用艾寧夏蘭特做正選，拍馬列斯、基亞利殊攻堅；另一矚目新中鋒，當然係達雲紐尼斯，之前熱身賽有唔少劣評，高普喺強強過招場合，當然要好好保護佢，將佢先放後備席，正選出沙拿、法明奴同路爾斯戴亞斯。
冇咗文尼，祖達又受傷，貴價新仔未入局，法明奴續受重用，佢喺前線中路做牽引角色，依然相當稱職，令兩個拍擋有空間發揮，左右路快放極有威脅。利物浦初段即佔據主動，搶到唔少埋門機會。21分鐘，沙拿右路邊線引出空位，曼城球員跟漏阿歷山大阿諾特，畀佢接應沙拿傳交後，喺禁區邊半射半傳入網，利物浦領先1:0。
夏蘭特上半場有兩個射門機會，都未能好好把握，而且仲未配合到曼城講究靈活走位戰術，加上兩個拍檔狀態一般，令曼城攻門威脅力非常不足。
下半場初段，曼城換入菲爾科頓，仲有新加盟嘅阿根廷年輕前鋒祖利安艾華利斯，前線速度激增，打番原有配合，果然到70分鐘，菲爾科頓近射被擋，艾華利斯執死雞扳平。
利物浦被追和後係有少少捱打，不過達雲紐尼斯中段入替法明奴後，威脅極大，呢位前賓菲加中鋒頂住強大壓力，出場後不斷狂奔，速度、走位都有水準，多次衝擊曼城防線。70分鐘頭槌攻門，令魯賓戴亞斯犯手球，由沙拿主射12碼破網；90分鐘更飛頂成3:1，令利物浦連輸兩屆後，終於捧走社區盾。
吹完場笛後，達雲紐尼斯跪地狂呼，所有話佢唔值8500萬鎊嘅質疑，暫時一掃而空。壓力依家去咗艾寧夏寧特度，從比賽所見，佢完全未融入曼城體系，期間仲有一幕係奇雲迪布尼拎住個波，但夏蘭特企喺度唔知點配合，搞到迪布尼發晒老脾，補時階段夏蘭特對住空門都射中楣，難怪佢都擰晒頭，依家要睇哥迪奧拿點調教番佢喇。
