達雲紐尼斯上場做完救世主，今場擔正正選一樣掂，該烏拉圭前鋒表現出色，協助利物浦於周日英超主場3:0大破阿士東維拉；蘇保斯拉爾亦得到加盟後首個士哥，令高普第300場英超更加完美。
利物浦上仗大難不死，大部份時間落後兼打少個，最後竟然反勝2:1，打下一支超級強心針，信心返晒嚟。達雲紐尼斯亦洗脫敗家仔污名，後備入替包辦兩個入球、成為救世主；既然由衰轉強，今仗即轉任正選，同沙拿、路爾斯戴亞斯合作攻堅，打出高水準進攻足球，賞心悅目。
高普上任紅軍主帥後，今仗係第300場英超，開波3分鐘即有激動時刻，7000萬歐元中場蘇保斯拉爾，接應右路角球，左路禁區外施展招牌遠射，球速勁快直飛入網，取得他加盟後首個士哥，亦是高普紅軍時代第900個入球。
人旺沒法擋，達雲紐尼斯全場奔跑，製造威脅，22分鐘窄位射門本來中柱唔入，但回防的馬迪卡殊將波撞番入網，令對手擺烏龍，利物浦領先2:0。達雲紐尼斯完半場有次窄位挑射，相當精妙，可惜中楣彈出。
雖然利物浦有後防主力雲迪積克停賽，但維拉面對上晒身嘅對手，根本一籌莫展，下半場依然捱打，勉強頂住紅軍快速流暢攻勢，但到55分鐘，終於再次失守。
雖然冇士哥，達雲紐尼斯今仗貢獻極大，走位靈活多變之外，又能發揮身高優勢，頭槌二傳遠柱，沙拿輕鬆撞入空門，利物浦擴大比數至3:0，最終亦以這個紀錄完場。
利物浦3勝1和，與熱刺、韋斯咸同得10分，落後榜首曼城2分，國際賽期之後，將於16號作客狼隊。維拉2和2負，下仗主場對水晶宮。
