【英超】遇強越強!紐卡素2:1挫熱剌升上第4 兩大因素助爭歐聯席位!

唔係講笑,真係殺上前四!紐卡素於周日英超又令強隊失分,今次仲要贏埋,作客2:1挫熱刺,終結該倫敦球會主場10連勝紀錄之餘,亦令熱刺相隔191日後,再次於主場輸波。

紐卡素今季對強隊紀錄良好,先後賽和曼市雙雄、僅負利物浦,而依家則作客贏埋熱剌,顯示球隊絕對有能力挑戰前列位置。經過12輪比賽,5勝6和1負,同車路士都係21分,以較佳得失球差進佔第4位。

有冇機會保持前4位置,進軍下季歐聯?紐卡素目前嘅最大優勢,係佢哋唔駛參加歐洲賽,喺今季超頻密賽程底下,呢點相當重要;而且紐卡素喺一月轉會窗重開時,可以有充足銀彈去作出相應收購,增加爭前4籌碼。

至於熱刺則度過失望一周,周中不敵曼聯,昨仗又輸埋畀紐卡素,加埋早前負阿仙奴,季初賽和車路士,於強強對碰中略處下風。

孫興民腳風唔順,加後防多甩漏,係熱刺目前嘅最大弱點,今仗亦如是。孫仔初段射靚波僅僅高出,單刀又被救出,輪到後面犯錯失波。

上半場所失兩球,洛里斯都有責任。31分鐘,洛里斯衝出禁區,同哥林威爾遜碰撞倒地,後者乘機笠入空門;40分鐘洛里斯開龍門球失誤,米基爾阿米朗搶到波,快速殺入禁區射成2:0,呢位巴拉圭攻擊中場,近5場4場有波入。

熱刺54分鐘頂成1:2,但之後嘅進攻,都過唔到有體力、紀律好嘅紐卡素防線,無法扳平,只能再失3分,12戰23分續排第3位。

同日榜首阿仙奴失分,作客1:1和修咸頓,仍領先曼城2分。中場格列沙加連續兩仗入波,為客軍先開紀錄,修咸頓由岩士唐扳平。阿仙奴近仗表現,的確略見疲態,但上半場加比爾捷西斯禁區內明顯畀對手拉跌,球證冇判12碼,亦具爭議性。