【英超】迪布尼首個頭槌士哥 激似雲佩斯世盃金球!曼城大炒白禮頓 啟動奪冠mode

曼城周四英超作客4:0大勝白禮頓,向衛冕大業行近一步,更犀利係奇雲迪布尼竟然用頭槌入波,仲要係離門15碼飛身插水式嘅金球!呢個金球被認為可媲美雲佩斯喺2014世盃嘅「天外飛仙」!

曼城贏波後排第2,踢少1場下落後阿仙奴1分,比利物浦多兩分,佢哋只要餘下5輪全勝,就肯定成功衛冕。曼城向來擅於季尾發力,一口氣登頂奪冠,上季就喺最後直路16場英超不敗,包括12連勝,力壓阿仙奴奪冠。目前佢哋亦已斬獲聯賽18場不敗,近4場全勝,又係連勝奪冠模式。

奇雲迪布尼開紀錄後,輪到科頓梅開二度,曼城上半場領先3:0;祖利安艾華利斯下半場入多粒,喺夏蘭特缺陣下,作客輕鬆大炒白禮頓。

講番個金球,發生喺17分鐘,基爾獲加傳中,奇雲迪布尼跑入禁區,離門15碼飛身插水式頭槌攻門,個波高速笠入死角,對方門將積臣史迪利鞭長莫及,應聲入網。今次係迪布尼首次喺英超用頭槌入波,佢賽後仲話自己唔擅長頂頭槌添!

呢球被各界大讚,可以同10年前荷蘭射手雲佩斯嘅金球作比較,當時雲佩斯突破越位接應長傳,喺禁區頂飛身頭槌,笠死西班牙門將卡斯拿斯。