麥佳亞反擊戰開波！季前被褫奪隊長臂章嘅曼聯中堅麥佳亞，目前正身在英格蘭國家隊集訓營，備戰嚟緊禮拜六對澳洲嘅友誼賽。唔知係咪返到國家隊自信心返晒嚟，賽前麥佳亞受訪突然爆Seed，揚言如喺曼聯再無正選就離隊！
麥佳亞近年一直成為球迷攻擊及嘲笑嘅對象，佢日前就自爆曼聯傳奇碧咸，曾主動Send msg開解及激勵佢：「碧咸係我偶像！你唔會想像到佢主動聯絡我，我嗰刻有幾感動。佢令我諗番起我以往嘅職業生涯同重要時刻，當一個人面對困難，呢啲以往嘅經歷就會幫到手。」
呢位30歲中堅並無因為各種嘲笑而沉淪，反而繼續Keep住自信，對佢嚟講點都係好事嚟，至少佢因為咁而保持雄心壯志，力爭正選。
由於曼聯防線出現傷病潮，麥佳亞喺上場聯賽反勝賓福特2:1，終於攞到佢今季第一次嘅聯賽正選位置，喺補時階段仲獻上助攻，成就麥湯文尼奇迹絕殺。
事實上，連埋上場，麥佳亞喺世盃後有18次正選上陣（曼聯同英格蘭），共獲16勝1和1負，勝率接近9成，2023年6次喺英超正選上陣，更獲全勝佳績，今年係咪轉運都好，唔到你唔服。
麥佳亞走出信心危機，今晨受訪更講明考慮離隊：「我喺坦哈格麾下嘅紀錄證明一切，無論係球會定國家隊，我做正選嘅勝率係好高！我之前15至20場踢正選，我會為自己嘅表現而開心。我接受唔到一個月只係得一場比賽，如果情況持續，我會同球會傾傾，唔會成世都係坐喺度。」
