車路士同曼城，周一凌晨英超上演超精彩入球大戰，以4:4打成平手。車仔今季雖然整體成績一般，但面對Big 6特別醒神，真正遇強愈強！
連同今仗在內，車仔今季4鬥Big 6 ，仍然保持不敗之身，之前1:1和利物浦、2:2和阿仙奴、上輪4:1大勝熱刺。今個星期進入國際賽期，到再下一個周末英超重開時，車仔又會連環對紐卡素、白禮頓、曼聯，到時會唔會又有驚喜？
今場過山車式經典大戰，上半場已經出現4個入球。25分鐘，曼城夏蘭特射入12碼先開紀錄。4分鐘後，堤亞高施華頂入角球，為車仔扳平。37分鐘，倒戈嘅史達寧撞入成2比1；完半場前，艾簡治頭槌為曼城追成2比2。
半場已經咁激，換邊後亦無放慢腳步，2分鐘，艾寧夏蘭特連人帶波入網，曼城再度領先。67分鐘，尼高拉斯積遜執雞再度追和。86分鐘，洛迪禁區外起腳，省中對手改變方向入網成4比3。正當以為呢場經典Show完結，車路士補時由波也博到12碼，彭馬倒戈中鵠，4比4完場。
今場兩軍合共炮製32次射門，車路士17次，曼城15次，中框次數合共19次。連埋今次，英超曾出現5次4比4，分別係1999年愛華頓對列斯聯、2001年查爾頓對韋斯咸、2007年熱刺對雷丁，同埋好多球迷仍然記憶猶新嘅2009年4月：利物浦對阿仙奴，嗰場波「沙皇」艾沙維個人獨取4球。
車路士領隊普捷天奴話：「今場波好精彩，啲人話英超係世界上最佳聯賽，當然係有原因。我哋想喺主場做啲特別嘢，呢個係車路士啲比賽方式，喺世界上最佳球隊面前攻入4球。」
曼城獲得1分後，12戰28分佔據榜首，領先同晚贏賓福特3比0嘅利物浦及阿仙奴1分；車仔16分排第10位。
