曼聯好多瓣都唔掂，其中一個死症係冇好嘅防守中場。危城告急，托水救亡，佢哋最急切想買到嘅人，係皇馬中場卡斯米路，願意提供嘅轉會費同人工更相當吸引。
卡斯米路已經30歲，英國傳媒指曼聯仍願意出重手，向皇馬提出7000萬歐元（6000萬歐轉會費+1000萬歐附加條款），畀卡斯米路一份5年合約，據知卡斯米路對轉會持開放態度，甚至Romano亦已認證，交易已接近成事。
雖然卡斯米路堅係弗，同莫迪歷、卻奧斯組成歐聯冠軍嘅中場線，但畢竟年紀唔細，如果真係如傳媒所講，用咁高價錢達成交易，會唔會唔多抵玩呢？
但現實迫人，面前咁多問題，曼聯就算周二凌晨對利物浦唔輸，漫長球季仍不容樂觀。特別經過首兩場慘敗後，防守中場費特、麥湯米尼水準之低劣有目共睹，有人甚至認為，佢兩個嘅問題比後防更嚴重。
現代足球得中場得天下，中場冇攔截同控制力，攻守都會失衡，雖然仲有好多人要換，例如隊長麥佳亞，但冇可能一次過換晒，搞掂個防中先係最逼切。卡斯米路的確好啱曼聯用，佢同費特喺巴西國家隊夾慣夾熟，卡斯米路做防線前嘅第一道屏障，費特則可推前少少，兼顧防守進攻，呢個配搭喺國家隊嘅成效，肯定好過麥湯搭費特100倍。
而且卡斯米路性格沉穩，容易團結隊友，曼聯有咁多性格巨星，預計呢位巴西中場若然加盟，對曼聯更衣室亦會有正面作用。若然交易成事，對皇馬嚟講亦有着數，賣一位30歲球員有近6億進帳，加上佢哋陣中有曹亞文尼、卡馬雲加兩大法國超新星接班，根本不愁戰力下降嘅問題。
