'

【英超】輕取維拉3:1;曼城下場贏埋即上榜首 夏蘭特傷出成隱憂

師徒對決、激過歐聯?曼城尋晚以3:1輕取阿士東維拉,依家追至落後榜首阿仙奴3分,但踢多一場,周三深夜,哥迪奧拿同阿迪達就會正面交鋒,呢場波對爭冠形勢極為關鍵,隨時比同晚上演嘅歐聯16強首回合更激、更多話題!

今場係曼城被英超賽會起訴後嘅首場賽事,雖然身陷風波,但無損球員戰意,4分鐘,馬列斯開出角球,洛迪卡斯簡迪頭槌建功,曼城順利開紀錄。

39分鐘,維拉守將張伯斯跣腳,夏蘭特睇定再助攻畀根度簡,2比0。完半場前,基亞利殊博到12碼,再由馬列斯操刀搞掂,領先到3比0。

見大局已定,哥帥喺半場期間換走有傷嘅艾寧夏蘭特同魯賓戴亞斯,而出番嚟後曼城亦明顯收晒油,維拉喺61分鐘由奧尼屈堅斯破蛋,最終曼城保持3比1勝果至完場。

全取3分後,曼城追貼榜首阿仙奴,目前打多一場下落後3分。周三深夜,曼城就會作客阿仙奴,如果曼城贏波的話,就可以憑較佳得失球登上一哥之位。

不過,曼城超級射手夏蘭特,賽後被指大腿有傷,未知踢唔踢到榜首大戰,哥迪奧拿話:「夏蘭特畀對手大力咁撞咗一下,佢覺得有少少唔舒服,由於領先3球,軍醫唔建議冒險,希望佢下場波可以上陣啦!」