買！買！買！咪又係輸波！車路士周日作客1:3負韋斯咸，剛加盟嘅天價中場摩西斯卡些度「地標戰」輸12碼，另一超貴中場安素費南迪斯就12碼宴客，高價翼鋒梅迪歷後備一出，原本流暢攻勢冇晒……相信普捷天奴血都嘔埋……
車路士有錢繼續任性，近幾日先以破英超紀錄（1億1500萬鎊）從白禮頓買入摩西斯卡些度，呢位厄瓜多爾中場先任後備；最新由修咸頓轉會，同樣任職中場嘅拉維亞則未入大軍名單。
普捷天奴教熱刺成名，鍾意用新人，今仗車仔陣容，重用卓克禾美卡、馬路古斯圖、高爾維等年輕球員，表現其實唔曳，可惜佢哋仍然係先落後一方。開波只有7分鐘，韋斯咸迫得角球，車仔走甩阿古特，畀呢位中堅輕鬆頂入。
賽前記者會，普捷天奴指責幾位車路士球員心態消極，如唔改善將有行動。雖然冇開名，唔少人估史達寧有份，唔知關唔關事，快樂寧今場弗到爆，有番速度與激情，同19歲中場卓克禾美卡左右輪流施襲，好有威脅。
卓克禾美卡28分鐘禁區內射門，扳平1:1，車仔繼續搶攻，43分鐘迫得12碼，但安素主射被艾路拿撲出，錯失反超機會。
半場休息，卓克禾美卡受傷，由梅迪歷入替。黑氣未除嘅佢出場之後，車仔上半場行雲流水攻勢冇晒，53分鐘更因後衞迪沙斯連環出錯，被韋斯咸中鋒米查利安東尼奧，藉一個突擊搞掂。
再度落後，車仔換入摩西斯卡些度，同安素費南迪斯組成超過兩億鎊組合；韋斯咸到67分鐘，亦有阿古特兩黃一紅被逐出場。
雖然打多個，但車仔仍缺乏威脅，摩西斯卡些度冇建樹之外，補時仲犯規輸12碼，盧卡斯柏基達射入，韋斯咸贏3:1完場。
車仔繼續買人，繼續唔識贏波，開季一和一負，普捷天奴有排執，會唔會衰多幾場又炒？好在下仗主場對盧頓，唔會贏唔到呀嘛？
