瘋狂燒錢車路士，聯賽盃只能肉酸晉級！周四凌晨，車路士閃電斟掂曼城超新星彭馬，而且價錢唔算太貴，被外界視為靚Deal，但車仔挾餘威出擊聯賽盃第2圈賽事，卻只能以2比1反勝英乙AFC溫布頓，令球迷大感失望。
車路士主場對住英乙仔，以為綽綽有餘，今場收起大半隊主力，門將羅拔山齊士、盛傳將轉投曼聯嘅古古列拿、中堅迪沙斯、中場干拿加歷查、前鋒麥杜基正選，其餘全部新人，點知19分鐘就出事，山齊士出迎打手槌，同一時間撞低對手，球證直指12碼，溫布頓搞掂、爆冷領先。
車路士完半場前亦博到12碼，麥杜基自導自演追成1比1。換邊後，車路士開始心急，尼高拉斯積遜、安素費南迪斯、摩西斯卡些度等天價球星先後落場，終於喺72分鐘安素建功，車仔反勝2比1晉級。
車路士一班新人表現一般，最終都係要由天價巨星先搞掂乙組仔，難怪佢哋對人哋嘅青訓產品情有獨鍾。
今場賽前，轉會大神Romano報導，車路士已經同曼城達成協議，簽入英格蘭U21中前場高爾彭馬，轉會費4,500萬鎊（約4.5億港元）。
彭馬今夏幫英格蘭贏U21歐國盃冠軍，開季後喺社區盾、歐超盃亦有士哥，被譽為超級新人王，但勢估唔到車路士一開價後，曼城就表示樂意放人，談判過程順利，最終彭馬亦落實轉投車仔。
計埋呢單交易，車路士今夏買人開支突破4億鎊，分別為1.15億鎊簽摩西斯卡些度、5,300萬鎊買拉維亞、5,200萬鎊收購尼干古等，連同之前兩個轉會窗，美國班主保利上任唔夠年半，已經用咗10億（約100億港元）！
至於聯賽盃第3圈抽籤亦已完成，車路士晉級後要對剛啱簽入巴塞新星安素法迪嘅白禮頓，而最精彩嘅，就係紐卡素主場對曼城，另外仲有曼聯主場對水晶宮，阿仙奴作客賓福特等英超對戰戲碼，賽事會喺9月尾上演。
第3圈抽籤主要戲碼：
阿士東維拉 VS 愛華頓
曼聯 VS 水晶宮
車路士 VS 白禮頓
賓福特 VS 阿仙奴
利物浦 VS 李斯特城
紐卡素 VS 曼城
*前者主場
