車路士終於得到新球季首場勝仗，主場3:0擊敗盧頓。史達寧有翻生跡象，繼續有全隊最突出嘅表現，梅開二度成為贏波功臣。
開鑼戰賽和利物浦，車路士展示高強度對抗能力，但上仗對韋斯咸，大好形勢下全失3分，實在令人極度失望。與上仗對韋斯咸比較，車路士今仗僅作出一個調動，地標戰後備犯錯輸12碼嘅卡些度擔正，同安素費南迪斯組成天價中場中軸，前線仍然由史達寧、干拿加歷查支援射手尼古拉斯積遜。升班馬盧頓有新加盟中場巴克里倒戈。
上半場，進攻節奏明快嘅車仔已展開圍攻之勢，安素費南迪斯曾射中楣。17分鐘，史達寧連過數關後，射入個人今季首個入球，車路士先開紀錄，半場領先1:0。
盧頓難越雷池半步，只能盡力防守，但去到68分鐘終於再失，史達寧接應古斯度傳中建功。75分鐘，又係史達寧，傳中畀積遜擺脫對手，後者取得加盟後首個入球，車路士大炒盧頓3:0。
開季3場波，車路士最突出球員，無疑係史達寧，快速推進入楔，有番効力利物浦、曼城時候嘅威脅性，今仗仲有兩個入球，再唔係踢近幾季畀人笑嘅「快樂足球」。
領隊普捷天奴安排佢做前線自由人，史達寧話好啱踢，並為今季定下目標，爭取成為車路士首席射手。車路士下周六主場對森林，跟住進入國際賽期。
