【英超】車仔6蛋狂炒愛華頓!彭馬食出完美大四喜 射手榜拍住夏L 瘋狂刷紀錄

彭馬又戴帽,車路士狂炒愛華頓!周一英超,車仔主場以6比0大勝愛華頓,高爾彭馬左右腳及頭都士哥,食出大四喜之餘更狂破紀錄!

上半場,彭馬用咗29分鐘就完成帽子戲法,13分鐘,呢位英格蘭國腳策動攻勢,同積遜one-two後用左腳喺禁區外起腳得手,揭開大屠殺序幕。

5分鐘後,彭馬用頭槌執雞頂入;第3球就最誇張,愛華頓門將碧福特犯錯失位,彭馬離門40碼外起右腳笠入,以29分鐘創下英超史上最快「完美帽子戲法」,車仔領先3:0。完半場前,尼高拉斯積遜轉身抽入,車路士上半場領先4球。

換邊後,車仔獲得12碼,高爾彭馬主射入網,成為自2010年林柏特之後,首位單場英超入波「4+」嘅車仔球員,同時係繼2010年杜奧巴後,車仔史上第2位連續2場英超主場「戴帽」嘅球員。臨完場前,20歲小將基卓斯埋齋,車路士大勝拖肥6:0完場。

車路士目前以31戰47分排第9,至於賽前為被扣2分上訴嘅愛華頓,則以32場27分排第16位。

彭馬今季聯賽入咗20球,追平曼城前鋒艾寧夏蘭特,並列射手榜第1位,以車仔嘅低迷戰績、加上呢位21歲英格蘭國腳係一位中場,入20球絕對係驚人數字。至於對上一位單季英超入20球嘅車仔英格蘭籍球員,係2009/10年球季嘅林柏特,當年林伯全季入22球。

另外仲有一點,彭馬嘅心理質素極高,今季9次12碼全部射入,命中率100%。而且今場有段小插曲,車仔獲得12碼後,積遜同馬度亞基爭射12碼,隊長干拿加歷查即刻將個波交畀彭馬,而彭馬亦不負所託,賽後更主動為事件降溫:「其他球員係想射12碼嘅,大家都想承擔責任,只係過咗火位啫,我先係劊子手嘛。我哋個個都好有鬥心,好小事,我哋之後仲拎番呢單嘢講笑添!」極具大將之風。