'

【英超】車仔正下一盤大棋!力斟奧巴美揚 背後原因令人暖心

今夏轉會窗,車路士同巴塞隆拿多次埋牙,就目前情況嚟講,車仔可以話係完敗,不過正所謂「商場無父子」、有利益就係朋友,車仔正同巴塞協商多方交易,希望斟掂奧巴美揚同法蘭基迪莊。

車路士換班主後,喺轉會市場屢次撞板,唔係班主唔肯科水,而係不停食球員檸檬,搞到主帥杜曹相當冇癮。前鋒盧卡古、一對守將基斯坦臣、魯迪格已經離隊,迪姆華拿亦盛傳會被拋售或借走,但車仔目前只簽入後備門將史路連拿頂kepa個位,以及史達寧、高列巴尼同古古列拿,仍急需補充兵源,尤其係中堅同前鋒位置。

目前多位球員都同車仔「傳緋聞」,計有李城守將科芬拿、PSG中堅甘佩比、AC前鋒拉菲爾利亞奧、士砵亭防中馬菲斯紐尼斯、維拉超新星卓胡美卡等等,當中最爆嘅,就係巴塞嘅法蘭基迪莊同奧巴美揚。

車仔加入戰團搶法蘭基迪莊唔係咩新聞,而據轉會權威Fabrizio Romano、以及英媒最新消息指,車仔正積極同巴塞協商,希望買入奧巴美揚,甚至研究連埋法蘭基迪莊一齊買、而馬高斯阿朗素及艾斯派古達則放畀巴塞嘅可能性。

奧巴美揚喺冬窗免費加盟巴塞,表現交足功課,但隨住羅拔利雲度夫斯基、拉芬夏等先後加盟,奧巴美揚喺巴塞已未必有碇企;對巴塞嚟講,賣走奧巴賺番筆轉會費之餘,佢同迪莊一齊打包上「車」的話,更可舒緩薪酬壓力,一直心儀已久嘅馬高斯阿朗素同艾斯派古達又有機會成為交易籌碼,呢單多方交易,或達致多贏局面。

奧巴美揚同車仔主帥杜曹,喺多蒙特年代曾經合作,2015/16、2016/17兩個球季,奧巴美揚共轟入56球,拎過德甲神射手,杜曹有晒說明書,時隔5年有機會故劍重逢,33歲嘅奧巴美揚可唔可以再闖高峰?

車路士會喺周日凌晨12點半登場,作客由名宿林柏特領軍嘅愛華頓。