周六英超10點場，曼城喺半場時間踢少個之下，主場以2:0擊敗今季表現唔錯嘅森林，6戰全勝繼續高踞榜首之餘，更創下各項賽事主場20連勝嘅紀錄，刷新隊史。
冇奇雲迪布尼、貝拿度施華、高華錫一樣冇問題，祖利安艾華利斯狀態大勇，仲有科頓同新兵杜古、馬菲奧斯紐尼斯幫手，支援就夠晒喇，反而係正箭頭夏蘭特近期把握力一般，近兩場嘥咗9次機會，上場仲畀哥迪奧拿暗串，今場主場出擊，極希望踢番場爭氣波。
森林今季表現唔錯，即使作客阿仙奴及曼聯亦僅輸一球，造訪車路士史丹福橋球場更全取3分而回，5戰7分佔據中游，表現令人喜出望外。
嚟到今戰，唔少球迷都憧憬森林會有啲力阻到曼城，可惜甫接戰就高下立見，曼城喺上半場佔有超過8成控球權，7分鐘就由科頓接應基爾獲加傳送先開紀錄。14分鐘，馬菲奧斯紐尼斯傳中恰到好處，夏蘭特一頂破網，盡吐烏氣。
極速領先兩球後，曼城又玩番最擅長嘅慢慢搓傳戰術，直至半場返更衣室。換邊後冇耐，終於有人挺身而出，令到場波刺激番啲，嗰位仁兄就係曼城中場洛迪靴南迪斯喇。
47分鐘，洛迪同森林嘅傑斯韋治嘈交，洛迪忍唔住用手叉韋治頸，被球證直接出示紅牌趕出場，嚟緊3場波都唔使預佢，包括10月頭作客對阿仙奴一戰。
不過森林始終級數較低，攻擊力亦不算銳利，埋門次數係多咗好多，但唔算有太大威脅，加上曼城門將艾達臣摩拉斯完美演出，最終曼城頂住贏2:0，連同歐聯同歐超盃7連勝，夏蘭特則6戰入8球，繼續領先射手榜，相當誇張。
