輸波無止境！車路士周日倫敦打吡，作客0比2負熱刺，球員表現差，信心鬥志盡失。即使美國老闆保利為面子繼續力撐，樸達自己仲有冇面留隊，面對車路士擁躉呢？
踏入2023年，車路士連盃賽踢咗11場，只有1場勝仗，連埋對多蒙特及修咸頓，已經3連敗。最大鑊係球員越踢越沉，落場如游魂，全無方向。上仗輸畀包尾修咸頓，已有擁躉向領隊樸達作出恐嚇，究竟樸達仲可以捱到幾時？
車路士冬季轉會窗瘋狂買人後，戰績、表現唔見好轉，樸達今仗重用原有戰將，史達寧、薛耶治復任正選，收起梅迪克、馬杜基等新兵。後防大哥堤亞高施華傷愈復出，但非常黑仔，大哥只踢咗15分鐘，又因為一次攔截，整傷膝頭哥，要被調離場。好多車迷擔心堤亞高施華傷勢，有球迷仲留言：如果佢要長抖，車仔會唔會降班？
新兵之中，仍以祖奧菲歷斯、安素費南迪斯較為對辦，前者有一次近距離攻門好有威脅，但未能把握。熱刺繼續出李察利臣，孫興民先做後備，上半場只有一次危險攻門，賀積查治禁區邊射中柱。
上半場完結前一次衝突，薛耶治原本巳食紅牌，球證睇完VAR改判黃牌；以為車路士逃過一刧，但下半場未夠1分鐘，畀熱刺中場奧利華史基普一腳遠程炮射爆，落後0比1。
奧利華史基比係熱刺青年軍出身，2018年簽職業球員約，連埋今仗上陣42場，第一次為熱刺入波。
車路士落後下，先後換入美臣蒙特、梅迪克同奧巴美揚，完全起唔到作用，攻勢繼續冇板斧，連一個較為接近嘅攻門都欠奉。駛咗咁多錢、試咗咁多場，依然交出呢個種表現，真係令人O嘴。
熱剌睇定嚟食，82分鐘藉角度攻勢，由竟然無人看管嘅哈利卡尼，近門射成2比0，勝出倫敦打吡，25戰45分續居第4，比紐卡素多4分，但多踢2場。
